Zeynəb Xanlarova parlamentdə Rasim Balayevdən DANIŞDI: “Onun dərman almağa pulu yoxdur”

“Atalarımızın bir sözü var, desəm öldürərlər, deməsəm ölərəm. Mədəniyyətimizə böyük töhfə verən, filmlərdə qəhrəman rolu yaradan Rasim Balayev haqqında danışmaq istəyirəm”.

Bu sözləri deputat, Xalq artisti Zeynəb Xanlarova deyib.

Z.Xanlarova bildirib ki, Rasim Balayev haqqında yazılanları hamı oxuyub və söhbətin nədən getdiyini bilir:

“Uzun illər filmlərə çəkilən, Nəsimi, Babəki və onlarla digər qəhrəmanların obrazını yaradan Rasim Balayevin həkimlərin yazdığı iki dərmandan birini almağa pulu yoxdur. Mən üzümü Səhiyyə Nazirliyinə, Mədəniyyət və Turizm Nazirliyinə tuturam. Bu işə niyə baxmırlar? Bu adam xəstədir, ömrünü bu sənətə qoyub, canında can qalmayıb. Niyə buna əncam qılmırlar? Mən millətimin, Rasim sevərlərin adından xahiş edirəm ki, bu işlə ciddi məşğul olsunlar. Onun aldığı pul nədir ki, bu pulu dərmanlara versin? Biz hamımız bu əsərləri yaradan böyük sənətkarımıza kömək olmalıyıq”.

Spiker Oqtay Əsədov isə bildirib ki, bu işlə maraqlanacaqlar.