ADAU-da fermerlər üçün daha bir seminar keçirilib

Kənd Təsərrüfatı Nazirliyi Azərbaycan Dövlət Aqrar Universitetinin (ADAU) mühəndislik fakültəsində fermerlərin iştirakı ilə növbəti seminar keçirilib.

ADAU-nun mətbuat xidmətinin xəbərinə görə “Aqrar sahədə yüksək məhsuldar maşınlar kompleksindən səmərəli istifadə” möv­zusunda olan elmi-praktik seminarı giriş sözü ilə təhsil müəssisəsinin Elmi işlər üzrə prorektoru Nizami Seyidəliyev açıb, tədbirdə iştiraka görə fermerlərə təşəkkürünü bildirib. Qeyd edib ki, ölkədə aqrar sahənin inkişafına dövlət dəstəyinin prioritet istiqamətlərindən biri kənd təsərrüfatı texnikası ilə təchizatdır.

Seminarda bildirilib ki, Azərbaycan Respublikası Prezidenti cənab İlham Əliyevin 2016-cı il 06 dekabr tarixli 1138 nömrəli Fərmanı ilə təsdiq edilən “Azərbaycan Respublikasında kənd təsərrüfatı məhsullarının istehsalına və emalına dair Strateji Yol Xəritəsi”ndə kənd təsərrüfatı məhsulları istehsalçılarının  texnika, maşın və avadanlıqlarla təminatının yaxşılaşdırılması və aqroservis xidmətləri bazarının inkişaf etdirilməsi ən vacib istiqamətlərdən biri kimi qəbul edilib. Bu isə öz növbəsində mühəndis kadrlara olan ehtiyacın artmasına, ADAU-nun qarşısında yeni vəzifələrin müəyyənləşdirilməsinə səbəb olub.  Kənd Təsərrüfatı Nazirliyinin dəstəyi ilə ADAU-da mühəndis kadrların hazırlanması istiqamətində genişmiqyaslı işlərin  görülməsi,  o cümlədən,  mühəndislik fakültəsinin tədris korpusunun əsaslı təmir edilməsi, fakültənin nəzdində maşın-traktor parkının “Aqrolizinq” ASC-nin xətti ilə ən müasir texnikalar və kənd təsərüfatı maşınları ilə təchizi kadr hazırlığı üçün bütün imkanları yaradıb.  Fakültədə  təhsil alan tələbələrin traktor və digər mexaniki nəqliyyat vasitələrini idarə etmək hüququ qazanması  üçün sürücülük kursları təşkili də hədəfə doğru atılan qətiyyətli addımlardandır. Digər ixtisaslarla yanaşı, “aqromühəndislik”, “meliorasiya və su təsərrüfatı tikintisi mühəndisliyi” ixtisasları üzrə tələbə qəbulunun yalnız dövlət sifarişi əsasında aparılması, yəni,  qeyd olunan ixtisaslarda təhsil alan tələbələrin təhsil haqqından azad edilərək dövlət büdcəsinin vəsaiti hesabına aylıq təqaüdlə təmin olunması mühəndis kadrların hazırlanmasına olan diqqət və qayğının bariz nümunələrindən biridir.

Aparıcı şirkətlərlə əməkdaşlıq əlaqələrinin qurulmasının və inkişaf etdirilməsinin vacibliyini qeyd edən rektor bu istiqamətdə görülən  işləri, o cümlədən,  “Aztexnika MMC” və “GrandMotors”MMC tərəfindən fakültədə ixtisaslaşdırılan tədris auditoriyalarının yaradılmasını, sürücülük vəsiqəsi alan tələbələrin “AgroDairy” MMC-nin taxıl sahələrində məhsul yığımında bilvasitə iştirak etməsini, habelə respublikanın müxtəlif bölgələrindən olan 230 operator üçün “JohnDeer” pambıqyığan kombaynlarının idarə edilməsi üzrə təlimlərin məhz universitet əməkdaşları tərəfindən aparılmasını əldə edilən müsbət nəticə kimi qiymətləndirib.

Şəmkir, Tovuz, Gədəbəy, Göygöl, Goranboy, Samux, və Tərtər rayonlarından olan  fermer və sahibkarların iştirak etdiyi elmi-praktik seminarda ADAU-nun alimləri “Gəncə-Qazax bölgəsində innovativ torpaqqoruyucu texnologiyaların və maşınların tətbiqi və kartofbecərən maşınların təkmilləşdirilməsi”, “Pambıqçılığın mexanikləşdirilməsinin inkişaf perspektivləri”, “Dənli bitkilərinin məhsuldarlığına təsir edən yazqabağı mexanikləşdirilmiş texnoloji əməliyyatların aparılmasının əhəmiyyəti”, “Bitkiçilikdə elmi əsaslandırılmış texnoloji xəritələrin tətbiqi” mövzularında məruzələr söyləyiblər.

Seminarda ADAU-nun alimləri fermerləri maraqlandıran sualları cavablandırıblar. Tədbirin sonunda mühəndislik fakültəsinin maddi-texniki bazasına baxış keçirilib.