BMT-nin İnkişaf Proqramının “İqlim Dəyişikliyinə Milli Uyğunlaşma Planına dəstək” layihəsi ADA Universiteti və İnkişaf və Diplomatiya İnstitutu ilə birgə təlim sessiyasına start verib. “Su və sahilyanı ərazilərdə iqlim dəyişikliyinə uyğunlaşma” adlı tədbir Azərbaycan Respublikası Ekologiya və Təbii Sərvətlər Nazirliyinin dəstəyi ilə noyabrın 21-dən 24-dək ADA-nın inzibati binasında keçiriləcək.

Təlimin əsas məqsədi müxtəlif dövlət qurumlarında fəaliyyət göstərən texniki kadrların potensialını artırmaqdır. Beynəlxalq və yerli məsləhətçiləri bir araya gətirməklə təşkilatçılar iqlim dəyişikliyinə uyğunlaşmanın kritik sahəsində bilik və bacarıqların inkişaf etdirilməsi üçün platforma təşkil edib.

Dörd gün davam edəcək təlim müxtəlif mövzuları əhatə edir. Proqramın bir hissəsi kimi, iştirakçılar iqlim dəyişikliyi ilə əlaqədar su sektorunda olan problemlər, həssaslığın qiymətləndirilməsi üsulları, sahilyanı ərazilərdə İqlim Dəyişikliyinə Uyğunlaşma strategiyaları, iqlim dəyişikliyinin həm kişilərə, həm də qadınlara diferensial təsirləri haqqında məlumat əldə edəcək. Bundan əlavə, iştirakçılar iqlim dəyişikliyi ssenarilərini və davamlı inkişafa nail olmaq üçün onların təsirləri ilə mübarizəni müzakirə edəcək.


“İqlim Dəyişikliyinə Uyğunlaşma Planının hazırlanması prosesində effektiv nəticələr əldə etmək üçün texniki səviyyədə iqlimə təsirlərin və həssaslığın öyrənilməsi və təhlili çox vacibdir”, - deyə BMTİP-nın “İqlim Dəyişikliyinə Milli Uyğunlaşma Planına dəstək” layihəsinin rəhbəri Zaur Əliyev qeyd edib.

“Təlim zamanı iştirakçılara müxtəlif ölkələrin uyğunlaşma planlarının proses və strukturu, habelə iqlim dəyişikliyinə uyğunlaşma tədbirləri haqqında məlumat veriləcək. İnanıram ki, bu bilik həm milli, həm də rayon səviyyəsində uyğunlaşma planlarının hazırlanması və nəticələrin əldə edilməsində mühüm rol oynayacaq. Bu cür təlim iqlimə davamlılıq və uyğunlaşmaya töhfə vermək üçün xüsusilə vacibdir”.

Təlimləri təşkil edən “İqlim Dəyişikliyinə Milli Uyğunlaşma Planına dəstək” layihəsi Azərbaycan hökumətinə üç prioritet sektor – su, kənd təsərrüfatı və sahilyanı ərazilərin iqlim dəyişmələrinə uyğunlaşması tədbirlərində dəstək olur. Yaşıl İqlim Fondunun maliyyələşdirdiyi və BMTİP-nin həyata keçirdiyi layihə hökumətin mövcud institusional, texniki və maliyyə potensialını gücləndirir ki, bu da öz növbəsində orta və uzunmüddətli iqlim adaptasiyası ehtiyaclarının Azərbaycanın milli inkişaf planlarına daxil edilməsini təmin edəcək.
KARUSEL / CƏMİYYƏT