ABŞ-nin “BrainBridge” şirkəti baş transplantasiyası əməliyyatını icra edə bilən yeni bir sistem yaratdığını açıqlayıb.
Şirkət bu əməliyyatın necə icra olunacağına dair bir video yayımlayıb və iddia edib ki, süni intellekt və robot texnologiyasının köməyi ilə beyin və onurğa beynini bir xəstədən digərinə köçürmək mümkün olacaq. Qeyd olunub ki, sözügedən tibbi əməliyyatın icrasına 8 ildən sonra başlanılacaq.
Layihə rəhbəri Haşem Al-Qhaili isə bu barədə danışarkən bildirib ki, bədənin qalan hissəsi gənc olarsa, həmin insanın bir neçə yüz il yaşamaq imkanı olacaq.
Bildirilir ki, 2016-cı ildə Avropa Neyrocərrahiyyə Cəmiyyətləri Assosiasiyasının Etika-Hüquq Komitəsi insan başının transplantasiyasının qeyri-etik olduğunu bəyan edib. Bununla belə, komitənin əməliyyatın həyata keçirilməsini dayandırmaq üçün qanuni səlahiyyəti yoxdur.

“BrainBridge”-ə görə, bu cür transplantasiyalar insult və onurğa beyni zədələri kimi həyatı dəyişən xəstələrə tam funksional bədənə sahib olmaq imkanı verə bilər. Təklif olunan sistemə görə, riski azaltmaq üçün beyin ölümü olan donorun, həm də başı yeni bədənə köçürüləcək pasiyentin bədəni əvvəlcə 5°C-yə qədər soyudulacaq. İddiaya görə, süni intellekt alqoritmləri əməliyyat zamanı həm əzələləri, həm də sinirləri izləyəcək və beyinlə bədən üzvləri arasındakı əlaqəni asanlaşdıracaq. Xəstə komada izləniləcək və immun sisteminin donoru rədd etməsinin qarşısını almaq üçün lazımi dərmanların verildiyi intensiv terapiya müddəti bir ay davam edəcək, sonra isə beynin nəzarəti tam bərpa olunacaq (“AzPolitika.info”).




 


SAĞLAMLIQ / KARUSEL