BMT Baş Assambleyasının 80-ci sessiyasının ümumi müzakirələri zamanı çıxış edən Türkmənistan prezidenti Serdar Berdiməhəmmədov bəyan edib ki, hazırkı beynəlxalq vəziyyət sülh və təhlükəsizliyin qorunması naminə dövlətlər və beynəlxalq təşkilatlar arasında əlaqələndirilmiş qarşılıqlı fəaliyyətə qətiyyətli keçid tələb edir. O, ölkənin neytral statusunun onun xarici siyasətinin əsası və qlobal sabitliyin möhkəmləndirilməsi üçün mühüm alət olaraq qaldığını vurğulayıb.

Türkmənistan sessiyanın gündəliyinə “Sülh və təhlükəsizlik naminə neytrallıq” adlı ayrıca bəndin daxil edilməsi təşəbbüsü ilə çıxış edib. Berdiməhəmmədovun sözlərinə görə, neytrallıq BMT-nin sülhməramlı strategiyasında praktiki mexanizm kimi effektivliyini sübut edib.

Türkmənistan rəhbəri xatırladıb ki, bu il Aşqabadın təşəbbüsü ilə Beynəlxalq Sülh və Etimad İli elan olunub. Dekabrda Türkmənistanda bu hadisəyə həsr olunmuş böyük yüksək səviyyəli forum keçiriləcək. Prezident həmçinin Mədəniyyət, Sülh və Etibar üzrə Ümumdünya Sammitinin keçirilməsini və dövlətlərarası münasibətlərin universal əsası kimi qlobal beynəlxalq etimad kodunun hazırlanmasını təklif edib.

Türkmənistan lideri əsrlər boyu Şərqlə Qərb arasında sivilizasiya körpüsü rolunu oynamış Mərkəzi Asiya regionuna xüsusi diqqət yetirib. O, BMT ilə əməkdaşlıq çərçivəsində region ölkələrinin, digər dövlətlərin və beynəlxalq institutların iştirakı ilə “Sülh şəraitində birgəyaşayış məkanı” adlı beynəlxalq forumun keçirilməsini təklif edib.

Digər təşəbbüs münaqişələrin həllində diplomatiya və neytral platformaların rolunu vurğulamaq üçün Beynəlxalq Vasitəçilik Gününün elan edilməsi olub.

Berdiməhəmmədov Türkmənistanın 2030-cu ilə qədər Dayanıqlı İnkişaf Gündəliyinin həyata keçirilməsinə sadiq olduğunu vurğuladı və 2026-2035-ci illəri BMT-nin Dayanıqlı Nəqliyyat Onilliyi elan etməyi təklif edib. “Bu addım nəqliyyat dəhlizlərinin inkişafı və onların bütün ölkələr üçün əlçatanlığını təmin etmək üçün dünya ictimaiyyətinin səylərini birləşdirəcək”, - o qeyd edib.

Ölkə həmçinin davamlı inkişaf üçün sabit enerji bağlantısının əsas rolu haqqında qətnamə layihəsini təqdim edəcək və rəqəmsal inteqrasiya üçün qlobal platformanın yaradılması təşəbbüsü ilə çıxış edəcək.

Türkmənistan prezidenti Mərkəzi Asiya ölkələri üçün səhralaşmaya qarşı mübarizə üzrə regional mərkəz yaratmaq niyyətində olduğunu bəyan edib. Digər təşəbbüslərə 2026-cı ildə Xəzər Ekoloji Forumunun keçirilməsi və əvvəllər Aşqabad tərəfindən təklif edilən Xəzər Ekoloji Təşəbbüsünün inkişaf etdirilməsi daxildir. Bundan başqa, Türkmənistan mədəni qarşılıqlı əlaqənin rolunu vurğulayaraq Beynəlxalq Çoxdilli Diplomatiya Gününün elan edilməsini təklif edib.


Berdiməhəmmədov BMT ilə əməkdaşlığın Türkmənistan üçün strateji prioritet olduğunu bəyan edib. O, Təşkilatın “qlobal legitimliyə malik yeganə universal struktur” olaraq qaldığını vurğulayıb. Prezident beynəlxalq sülhün və əməkdaşlığın hüquqi əsaslarını möhkəmləndirmək üçün 2028-ci ilin “Beynəlxalq hüquq ili” elan edilməsini təklif edib.

Reportyor.az

https://www.youtube.com/watch?v=XLh_6DUTJ04





KARUSEL / DÜNYA