Hindistanın 75-ci Respublika Günü münasibətilə bu ölkənin Azərbaycandakı Səfirliyi rəsmi qəbul təşkil edib.
Hindistanın Azərbaycandakı səfiri Sridharan Madhusudhanan tədbirdə çıxış edərək ölkəsinin müstəqillik dövründə əldə etdiyi nailiyyətlərdən söz açıb.
Səfir deyib ki, Hindistan qlobal ticarət istəkləri 2030-cu ilə qədər iki dəfə artaraq 1,6 trilyon dollardan 3 trilyon dollara çatmaq məqsədi ilə iddialıdır.
O, ölkələrimiz arasındakı əlaqələrə toxunaraq qeyd edib ki, Hindistan Azərbaycanın yeddi ən böyük ticarət tərəfdaşı sırasındadır və ticarət dövriyyəsində ciddi artım perspektivi var: "Biz görürük ki, Azərbaycan sabitliklə yanaşı, iqtisadiyyatın şaxələndirilməsinə də böyük önəm verir. Biz ikitərəfli ticarət əlaqələri inkişaf etdirmişik. 2023-cü ildə Hindistan Azərbaycandan xam neft ixrac edən üçüncü ən böyük istiqamətə çevrilib.

Diplomat həmçinin əlavə edib ki, Hindistan həm də Azərbaycanın ən böyük turizm mərkəzidir: "Əminəm ki, Bakıdan Dehli və Mumbaya həftədə yeddi dəfə həyata keçirilən reyslər xalqlarımız arasında əlaqələri genişləndirəcək”.
Azərbaycan hökuməti adından Hindistan xalqını bayram münasibətilə təbrik edən Azərbaycanın xarici işlər nazirinin müavini Elnur Məmmədov deyib ki, Azərbaycan və Hindistan nəqliyyat və rabitə sahəsində əlaqələri inkişaf etdirməyə çalışır. O qeyd edib ki, Şimal-Cənub beynəlxalq nəqliyyat dəhlizinin geniş iqtisadi imkanlarından səmərəli istifadə yalnız birgə səylərlə mümkündür:"Məlum olduğu kimi, hazırda Azərbaycan işğaldan azad edilmiş ərazilərdə genişmiqyaslı yenidənqurma işləri ilə müşayiət olunan yeni iqtisadi layihələr həyata keçirir. Bu səylər regionlararası ticarətdə yeni imkanların inkişafına xeyli yol açır". O əlavə edib ki, Cəbrayılda Ağdam Sənaye Parkına və Araz Vadisi İqtisadi Zonasına maraq artır.
Ötən il “Azərbaycan Hava Yolları” QSC-nin Bakı-Dehli-Bakı marşrutu üzrə fəaliyyətini bərpa etməsini, Hindistanın “IndiGo” aviaşirkətinin Dehli-Bakı-Dehli marşrutu üzrə reyslərə başlamasını, AZAL-ın isə Bakı-Mumbay-Bakı marşrutunu işə salmasını müzakirə edərək, Elnur Məmmədov qeyd edib ki, bu, 117 min hindistanlı turistin Azərbaycana gəlməsinə səbəb olub. Bu, 2023-cü illə müqayisədə əhəmiyyətli artım deməkdir.

Daha sonra musiqiçilərin ifasında Hind mahnı və rəqsləri təqdim olunub.



KARUSEL / SİYASƏT