Polşa ABŞ-ın General Atomics şirkəti ilə MQ-9B Sky Guardian pilotsuz təyyarələri almaq üçün təxminən 1,2 milyard zloti (295 milyon dollar) dəyərində müqavilə imzalayıb.

Reportyor.az xəbər verir ki, bu barədə Polşanın müdafiə naziri Vladislav Kosiniak-Kamış deyib.

Ukraynadakı münaqişə fonunda Polşa böyük texnika və silahlar alır və 2025-ci ildə müdafiə xərcləri ÜDM-in 4,7 faizini təşkil edəcək.

Müdafiə naziri Vladislav Kosiniak-Kamış deyib ki, bu, ən müasir texnologiyadır... Bu, ciddi xərcdir, lakin bu, ən keyfiyyətli avadanlıqdır: “Bir neçə ay əvvəl mən dron qüvvələrinin yaradılmasını elan etdim, bu fakta çevrilir. Yanvarın 1-dən pilotsuz təyyarələr artıq plan deyil, Polşa ordusunun həqiqi hissəsi olacaq”.

Müdafiə Nazirliyi bildirib ki, Amerika pilotsuz təyyarələri 2027-ci ilin birinci rübündə Polşaya çatdırılacaq və ordu hazırda texnikanın köhnə versiyasını icarəyə götürür.
---