1 noyabr Əlcəzair İnqilabının başlanmasının 71-ci ildönümü münasibətilə bu ölkənin Azərbaycandakı səfirliyi rəsmi qəbul təşkil edib.

Səfiri xanım Zəkiyyə İğıl qonaqları salamlayaraq ölkəsinin tarixindən söz açıb: "Bu axşam Əlcəzairin Milli Gününü, millətimizin taleyini əbədi olaraq dəyişdirən və dünyanın hər yerində saysız-hesabsız insana ilham verən 1 noyabr 1954-cü il Şanlı İnqilabının başlamasının 71-ci ildönümünü qeyd edərkən hamınızı salamlamaqdan böyük şərəf və böyük məmnunluq duyuram".


Yetmiş bir il öncə Əlcəzair xalqı bir əsrdən çox davam edən müstəmləkə hakimiyyətindən sonra azadlıq və ləyaqətini bərpa etmək üçün birlik və cəsarətlə ayağa qalxdı. 1 Noyabr İnqilabı sadəcə bir itaətsizlik aktı deyil, ədalətə, müstəqilliyə və azadlığa inamın bəyannaməsi idi.
Əlcəzair uzun və əzablı bir mübarizədən və böyük qurbanlardan sonra 5 iyul 1962-ci ildə suverenliyini bərpa etdi. Qələbəmiz təkcə bir millətin zəfəri deyil, eyni zamandahələ də öz müqəddəratını təyin etmək arzusunda olan bütün xalqlar üçün bir ümid mesajı oldu.
Əlcəzair İnqilabı Afrika, Asiya və Latın Amerikasında azadlıq hərəkatlarının yolunu işıqlandıraraq dözümlülük və ilham simvoluna çevrildi.
Bu gün biz həmin mübarizənin şəhidlərinin və qəhrəmanlarının xatirəsini ehtiramla yad edərkən, həm də öz təməl dəyərlərinə, azadlığına, birliyinə, həmrəyliyinə sadiq qalan, gələcəyə inamla baxan bir xalqı anırıq.

Müstəqilliyin yetmiş onilliyi ərzində Əlcəzair bütün sahələrdə, siyasi, iqtisadi və sosial sahədə davamlı tərəqqiyə nail olub. Prezident Əbdülməcid Tebbunun rəhbərliyi altında ölkəmiz öz qurumlarını müasirləşdirmək, iqtisadiyyatını şaxələndirmək və innovasiya və investisiyaları təşviq etmək məqsədilə genişmiqyaslı islahatlar həyata keçirir.


Əlcəzair imkanlar ölkəsidir, təbii sərvətlərlə zəngin olmaqla yanaşı, xalqının əzmi və yaradıcılığı ilə daha da zəngindir. Gənc əhalisi, dinamik özəl sektoru və Afrika, Ərəb dünyası və Aralıq dənizini birləşdirən strateji mövqeyi ilə Əlcəzair regionlar arasında əməkdaşlıq və dialoq körpüsü kimi önəmli rol oynayır. Beynəlxalq arenada Əlcəzair ədalətli səbəbləri dəstəkləməyə, çoxtərəfliliyi və beynəlxalq əməkdaşlığı təşviq etməyə qətiyyətlə sadiq qalaraq, sülh, dialoq və həmrəyliyin carçısı kimi konstruktiv rolunu davam etdirir.


Ölkələrimiz arasında müsanibətlərə toxunan səfir, deyib ki, bu il Əlcəzair və Azərbaycan  arasında diplomatik münasibətlərin 31 illiyini qürurla qeyd edilir.

"1994-cü ildə münasibətlərimizin qurulmasından bəri, qarşılıqlı hörmət, dostluq və suverenliyin qorunması, daxili məsələlərə müdaxilə etməmək və xalqların öz müqəddəratını təyin etmək hüququnu da əhatə edən ortaq prinsiplərə əsaslanan əməkdaşlığımızı davam etdiririk. Son üç onillikdə Əlcəzair və Azərbaycan arasında etimad və əməkdaşlığa əsaslanan münasibətlər qurulmuşdur ki, bu da bizim beynəlxalq təşkilatlar, o cümlədən Birləşmiş Millətlər Təşkilatı, Qoşulmama Hərəkatı, İslam Əməkdaşlıq Təşkilatı və Qaz İxrac Edən Ölkələr Forumu çərçivəsində sıx əməkdaşlığımızda öz əksini tapıb".

Son illərdə ikitərəfli əməkdaşlıq yüksək səviyyəli səfərlərin fəal mübadiləsi və müxtəlif sahələr üzrə əməkdaşlığın gücləndirilməsi ilə yeni mərhələyə yüksəlib. Bu nailiyyətlər hər iki ölkənin tarixi dostluq əlaqələrini dinamik və qarşılıqlı faydalı tərəfdaşlığa çevirmək istiqamətində səmimi iradəsini əks etdirir.

Azərbaycan Prezidenti İlham Əliyevin 2022-ci ildə Əlcəzairə tarixi səfərini xatırladan diplomat deyib ki, Əlcəzair-Azərbaycan münasibətlərində yeni bir mərhələnin başlanğıcını qoydu. Bu səfər böyük əhəmiyyət daşıyırdı və siyasi dialoq, iqtisadi tərəfdaşlıq və qarşılıqlı mədəni anlaşmaya dair ortaq öhdəliklərimizi yenidən təsdiqi kimi yenidən tarixə düşdü.


"Bu səhər Əlcəzairdən qayıtdığımı xüsusi məmnunluqla sizinlə bölüşmək istərdim. Azərbaycanın Xarici İşlər naziri, Ceyhun Bayramovun 3-4 noyabr tarixlərində Əlcəzairə ilk rəsmi səfəri çərçivəsində iştirak etmək mənim üçün böyük şərəf olub.  Bu tarixi səfər Əlcəzair-Azərbaycan münasibətlərində yeni səhifə açdı və hər iki ölkənin tərəfdaşlıq münasibətlərini daha da möhkəmləndirmək istiqamətində güclü siyasi iradəsini bir daha təsdiqlədi. Bu münasibətlə, həmin səfər çərçivəsində ölkələrimiz arasında strukturlaşdırılmış və uzunmüddətli əməkdaşlıq üçün möhkəm institusional zəmin formalaşdıran İqtisadi, Elmi və Texniki Əməkdaşlıq üzrə Birgə Komissiyanın yaradılmasına dair mühüm Saziş imzalanıb".

Bu ilin aprel ayında Əlcəzair ölkələrin Xarici İşlər Nazirlikləri arasında siyasi məsləhətləşmələrin ikinci sessiyasına ev sahibliyi etdi. Bu məsləhətləşmələr ortaq maraq doğuran regional və beynəlxalq məsələlər üzrə fikir mübadiləsi aparmaq və bərpa olunan enerji, ali təhsil və texnoloji innovasiyalar da daxil olmaqla, əməkdaşlığın yeni istiqamətlərini müəyyənləşdirmək üçün mükəmməl bir imkan yaratdı. Bütün bu müsbət nailiyyətlər Əlcəzair və Azərbaycanın ortaq qətiyyət, qarşılıqlı etimad və gələcəyə yönəlmiş ümumi baxışla birgə irəlilədiyini əyani şəkildə nümayiş etdirir.

"Milli Günümüzü qeyd edərkən, şanlı keçmişimizi yad etməklə yanaşı, daha parlaq gələcək naminə öhdəliyimizi bir daha təsdiq edirik. Qürurlu, dözümlü və gələcəyə inamla baxan Əlcəzair xalqı, azadlıq, ədalət və həmrəylik kimi, İnqilabının ali ideallarını təcəssüm etdirən bir dövlət qurmaq yolunda sarsılmaz qətiyyət nümayiş etdirir.

Bu yolda biz Azərbaycanı, ümumi dəyərləri və bir-birini tamamlayan istəkləri paylaşdığımız həqiqi və dəyərli tərəfdaş kimi görürük. Biz birlikdə iqtisadi əlaqələrimizi daha da gücləndirə, mədəni mübadilələrimizi genişləndirə və təkcə regionlarımızda deyil, həm də daha geniş beynəlxalq müstəvidə sülhün, sabitliyin və rifahın möhkəmlənməsinə öz töhfəmizi verə bilərik.

Arzu edirəm ki, Əlcəzair və Azərbaycan arasındakı möhkəm dostluq əlaqələri daha da dərinləşib çiçəklənməyə davam etsin, xalqlarımız daim sülh, firavanlıq və həmrəylik şəraitində yaşasınlar.




Azərbaycan hökuməti adından Əlcəzair xalqını bayram münasibətilə təbrik edən Azərbaycanın Energetika naziri Pərviz Şahbazov deyib ki, bu gün müstəqillik və azadlıq uğrunda mübarizədə nümayiş etdirilən sarsılmaz iradənin simvolu kimi dayanır və Əlcəzair xalqının tarixinə qəhrəmanlıq fəsli kimi həkk olunub.

"Amansız müstəmləkə siyasətinə müqavimət göstərməkdə əlamətdar cəsarət nümayiş etdirən Əlcəzair xalqı bir milyon yarım şəhidin hesabına azadlığını qazandı. Bu, dünya tarixində müstəqillik uğrunda milli mübarizənin əlamətdar nümunəsidir. Əlcəzairin azadlıq axtarışının simvolu olan Cəmilə Buhiredə bir şeirin həsr olunması və Azərbaycanın onu öz qəhrəmanı kimi qəbul etməsi xalqlarımızı bir-birinə bağlayan azadlığın, ədalətin və mənəvi həmrəyliyin parlaq sübutudur".

Hətta ötən əsrdə də Azərbaycan neftçilərinin, geoloqlarının və mədəniyyət xadimlərinin Əlcəzairdəki fəaliyyəti, eləcə də Əlcəzair gənclərinin Azərbaycanda təhsil alması ikitərəfli münasibətlərimizin möhkəm təməlinin olduğunu sübut edir.
Sovet dövründən bəri mövcud olan Azərbaycan və Əlcəzair xalqları arasında dostluq bu gün də dövlət başçılarının siyasi iradəsinə uyğun olaraq uğurla inkişaf etməkdə davam edir.
2022-ci ildə Azərbaycan Prezidenti İlham Əliyevin Əlcəzairə səfəri ölkələrimiz arasında ikitərəfli münasibətlər tarixində yeni bir fəsil açdı.
Azərbaycan və Əlcəzair Birləşmiş Millətlər Təşkilatı, İslam Əməkdaşlıq Təşkilatı və Qoşulmama Hərəkatı çərçivəsində səmərəli əməkdaşlıq edirlər.
Siyasi məsləhətləşmələr münasibətlərimizin davamlı inkişafına töhfə verir.
Əlcəzairin Azərbaycana investisiyaları, Əlcəzair şirkətlərinin ölkəmizdəki fəaliyyəti və ticarət dövriyyəsinin dinamikası iqtisadi münasibətlərimizin artımını əks etdirir.


Nazir deyib ki, iki ölkə enerji, ticarət, kənd təsərrüfatı və turizm sahələrində iqtisadi tərəfdaşlıqlarını genişləndirmək üçün əhəmiyyətli potensiala malikdir.
Xüsusilə, enerji sektorunda “OPEC plus” və Qaz İxrac Edən Ölkələr Forumu çərçivəsində, eləcə də neft, neft və qaz məhsulları ticarəti sahəsində mövcud əməkdaşlığı daha da dərinləşdirmək üçün əlverişli imkanlar mövcuddur.
Bu əməkdaşlıq həmçinin karbohidrogen, neft-kimya və “yaşıl enerji” layihələrini, enerji məhsullarının tədarükü və nəqlini, birgə təşəbbüslərin həyata keçirilməsini və təcrübə mübadiləsini əhatə edən Anlaşma Memorandumu vasitəsilə təşviq olunur.
Birgə İşçi Qrupunun fəaliyyəti, SOCAR və Sonatrach arasında gücləndirilmiş əməkdaşlıqla yanaşı, bu prosesdə əsas rol oynayır.
Beynəlxalq təşkilatlar arasında möhkəm nüfuzu və genişmiqyaslı tədbirlərin təşkilində geniş təcrübəsi ilə tanınan Azərbaycan 2026-cı ildə İslam Əməkdaşlıq Təşkilatının Zirvə Toplantısı və Dünya Şəhər Forumu kimi böyük tədbirlərə ev sahibliyi edəcək.
Əlcəzairin bu tədbirlərdə fəal iştirakı və dəstəyi əməkdaşlığımızın daha da inkişaf etdirilməsinə dəyərli töhfə verəcək.
Əminik ki, dostluğa və əsrlər boyu davam edən ənənələrə əsaslanan Azərbaycan-Əlcəzair münasibətləri güclü təməllər və geniş imkanlarla dəstəklənən ölkələrimizin çiçəklənməsini davam etdirəcək.











Reportyor.az







KARUSEL / SİYASƏT