Onu da qeyd edim ki, müstəqilliyinin ilk günlərindən Ermənistanın və dünya ermənilərinin ərazi iddiaları ilə üzləşmiş Azərbaycan öz cinayətlərinə haqq qazandırmağa çalışanların nə qədər irimiqyaslı yalanlardan, dezinformasiyalardan istifadə etdiyini çox gözəl bilir.

Bu illər ərzində bir çoxları - dünyanın aparıcı KİV-lərinin jurnalistləri, xarici bloqgerlər, müxtəlif xarici QHT-lərin nümayəndələri və müxtəlif səviyyəli siyasətçilər Ermənistan-Azərbaycan münaqişəsinin səbəb və nəticələri barədə yalan danışıblar.

Söhbət dövlətlərin yüksək vəzifəli şəxslərinin də səsləndirdiyi yalanlardan gedirdi. Məsələn, Fransa prezidenti Emmanuel Makron 44 günlük müharibə zamanı dəfələrlə əslində erməni təbliğatının ruporu rolunu oynayaraq uydurma məlumatlar yayıb. Şəhər merlərindən tutmuş parlamentarilərə qədər digər fransız siyasətçiləri də ölkəmiz haqqında açıq-aşkar dezinformasiyalar tirajlayırdılar.

Bu, beynəlxalq hüququn yerinə yetməsinə, BMT Baş Assambleyası və Təhlükəsizlik Şurasının dörd məşhur qətnaməsinin qarşısını almağa kömək etdimi? Bu, Azərbaycanın suverenliyinin və ərazi bütövlüyünün tam bərpasına mane oldumu? Yox. Amma Azərbaycanı ləkələmək kampaniyasında iştirak edən hər kəs öz reputasiyasını əbədi olaraq korladı. Onlar indi ata Aleksandr Dümanın dünyaca məşhur romanında Miledi Vinterin daşıdığı damğanı daşıyırlar.

Bəli, reputasiyanın ləkələnməsi ömürlük cəzadır. Bunu bizim hamımız, 7-ci çağırış Milli Məclisin deputatlığına namizədliyi irəli sürülmüş və qeydə alınmiş namizədlər unutmamalıyıq. Təəssüf ki, əvvəlki parlament seçkilərində olduğu kimi, indi də seçki kampaniyasında parlamentə bu və ya digər namizədlər tərəfindən saxta xəbərlərdən və dezinformasiyalardan istifadə nümunələri görürük. Namizədlərdən bəzilərinin bütün seçki kampaniyasını rəqiblərini qaralamaq üzərində qurması nümunələri olub və var. Bu, düzgün deyil.

Əminəm ki, Azərbaycanda istənilən siyasi polemika dövlətin və cəmiyyətin inkişaf yolu ilə bağlı müxtəlif baxışların qarşıdurmasını ifadə edən qanun çərçivəsində aparılmalıdır. Bu, yüksək intellektual debat, zəka döyüşü olmalıdır, rəqibi gözdən salmaq üçün çempionat yox.

Yeni çağırış Milli Məclisə deputatlığa namizəd olan hər birimiz üzərimizə götürdüyümüz missiyanın fərqində olmağa borcluyuq. Bu, hakimiyyətin qanunvericilik qolu nümayəndələrinin missiyasıdır.

Odur ki, gəlin Cənubi Qafqazın aparıcı dövlətinin gələcəyini onun əsaslarını möhkəmləndirəcək və vətəndaşlarının həyatını yaxşılaşdıracaq qanunların qəbulu yolu ilə müəyyənləşdirmək hüququ uğrunda mübarizə aparanların statusuna uyğun olaq.

Gəlin seçki kampaniyamızı elə aparaq ki, seçkinin sonunda rəqiblərimizlə qarşılaşanda qarşılıqlı hörmət hissi ilə onların əlini sıxa bilək.

Tarix: 25-07-2024, 12:37