Rusiya prezidenti Vladimir Putin və Çin prezidenti Si Cinpin cümə axşamı günü telefonla danışıb və hər iki lider İsraili İrana zərbələrinə görə qınayıb, gərginliyin azaldılmasının zəruriliyi barədə razılığa gəlib.

Reportyor.az xəbər verir ki, bu barədə Kremlin köməkçisi Yuri Uşakov jurnalistlərə bildirib.

"Hər iki şəxs İsrailin BMT Nizamnaməsini və beynəlxalq hüququn digər normalarını pozan hərəkətlərini kəskin şəkildə pisləyir. Həm Moskva, həm də Pekin hazırkı vəziyyətin və İranın nüvə proqramı ilə bağlı məsələlərin hərbi yolla həllinin mümkün olmadığına kökündən inanır. Bu həll yalnız siyasi və diplomatik yollarla əldə edilməlidir".

Rusiya İsrail-İran münaqişəsinin yeddinci günündə daha da şiddətlənəcəyi təqdirdə fəlakət barədə xəbərdarlıq edib və ABŞ-ı İsrailin bombardmanlarına qoşulmamağa çağırıb.

Putin son günlər ABŞ prezidenti Donald Tramp, İsrailin baş naziri Benyamin Netanyahu və İran prezidenti Məsud Pezeşkianla əlaqə saxlayıb.

Rusiya müharibə edən tərəflər arasında vasitəçilik etməyə hazırdır.

Hələlik heç kim Rusiyanın təklifini qəbul etməyib.

Cümə axşamı Putin bu təklifi yaxın müttəfiqi Si ilə telefon danışığında təkrarladı.

Uşakovun sözlərinə görə, Çin lideri bu ideyanı dəstəklədiyini bildirib: “O hesab edir ki, bu, mövcud kəskin vəziyyətin deeskalasiyasına xidmət edə bilər”.

İki şəxs yaxın günlərdə sıx əlaqə saxlamağa razılaşıblar.




KARUSEL / DÜNYA