Çinin Ticarət Nazirliyi bildirib ki, Birləşmiş Ştatlar Çinə qarşı ardıcıl olaraq çoxsaylı ayrı-seçkilik məhdudlaşdırıcı tədbirlər tətbiq etməklə Cenevrədə Çin-ABŞ iqtisadi və ticarət danışıqları zamanı əldə olunan konsensusu ciddi şəkildə pozub.

Reportyor.az xəbər verir ki, bu barədə Sinxua nazirliyin sözçüsünə istinadən bildirir.

Qeyd edir ki, bu tədbirlərə süni intellekt çiplərinin ixracına nəzarət üzrə təlimatların verilməsi, çip dizayn proqramlarının Çinə satışının dayandırılması və çinli tələbələr üçün vizaların ləğvinin elan edilməsi daxildir.

Sözçü bildirib ki, bu hərəkətlər iki dövlət başçısı arasında yanvarın 17-də telefon danışığı zamanı əldə olunmuş konsensusu ciddi şəkildə pozub və Çinin qanuni hüquq və maraqlarına ciddi zərbə vurub.

Sözçünün sözlərinə görə, Birləşmiş Ştatlar birtərəfli və dəfələrlə ikitərəfli iqtisadi və ticarət münasibətlərində qeyri-müəyyənliyi və qeyri-sabitliyi gücləndirərək yeni iqtisadi və ticarət çəkişmələrinə səbəb olub.

"Birləşmiş Ştatlar öz hərəkətləri üzərində düşünmək əvəzinə, əsassız olaraq Çini konsensusu pozmaqda ittiham edib, bu iddia faktları kobud şəkildə təhrif edir. Çin bu əsassız ittihamları qətiyyətlə rədd edir", - sözçü bildirib.

Çin və ABŞ mayın 10-da Cenevrədə ticarət danışıqları keçirərək qlobal iqtisadiyyatı pozan ticarət müharibəsinin qarşısının alınması istiqamətində bir addım atıblar.

KARUSEL / İQTİSADİYYAT