Pakistanın Bəlucistan əyalətində baş verən ayrı-ayrı partlayışlar nəticəsində azı 11 nəfər ölüb.

Bu barədə yerli mediaya rəsmilər bildiriblər.

Əfqanıstan və İranla sərhəddə yerləşən minerallarla zəngin Bəlucistanda silahlılar artmaqdadır və bu, genişmiqyaslı antiterror əməliyyatı ilə qarşılanıb.

Cümə axşamı günü Pakistanın cənub-qərbində, İran yaxınlığındakı Dəştdə kamikadze partlayıcı yüklü avtomobili yarımhərbiləşdirilmiş əsgərlərin karvanına sürüb.

İki yerli hökumət rəsmisi AFP-yə bildirib ki, ölən beş nəfər arasında üç hərbçi var. Hücumu separatçı Bəluc Azadlıq Ordusu qruplaşması öz üzərinə götürüb.

Yerli hökumət rəsmisi İmtiaz Əli Bəluç AFP-yə bildirib ki, cümə axşamı gecə əyalətdə Əfqanıstan sərhəd keçid məntəqəsi yaxınlığında baş verən daha bir partlayış nəticəsində altı işçi həlak olub.

Separatçılar Bəluc xalqına qarşı ayrı-seçkiliyə son qoymaq məqsədi ilə Pakistan ordusuna qarşı on ildir davam edən üsyanla mübarizə aparırlar.

İnsan haqları qrupları deyirlər ki, repressiyalar yerli əhalinin əsassız saxlanması və həbsi kimi hüquqların pozulmasını da əhatə edir.

Bu ay əyalətin paytaxtı Kvettada keçirilən siyasi mitinqdə İŞİD qruplaşmasının üzərinə götürdüyü kamikadze hücumunda 15 nəfər həlak olub.

Reportyor.az



KARUSEL / DÜNYA