Məşhur Balfur Bəyannaməsinin 108-ci ildönümündə Fələstin Dövlətinin Azərbaycandakı Səfirliyi bəyanat yayıb.

Bəyanatda bildirilir ki, Britaniya hökuməti tərəfindən 2 noyabr 1917-ci ildə qəbul edilən bu bəyannamə müasir dövrün ən böyük tarixi ədalətsizliklərindən birinin əsasını qoyub və onun müstəmləkə və siyasi nəticələri davam edən İsrail işğalı və Fələstin xalqının legitim milli hüquqlarının inkarı ilə bu günə qədər davam edir.

Səfirlik təsdiq edir ki, bu bəyannamə Fələstin torpaqlarında müstəmləkəçi qurumun yaradılması üçün əsas yaradıb və bu da Fələstin xalqının Nəkbə (“fəlakət”, “müsibət”), didərgin salınması və öz müqəddəratını təyinetmə hüququndan məhrum edilməsinə gətirib çıxarıb. İşğalçı rejimin köçkünlük, məskunlaşma, mühasirə və beynəlxalq humanitar hüququn pozulması siyasətini davam etdirməsi ilə fələstinlilərin əzab-əziyyətləri bir əsrdən çox vaxt keçməsinə baxmayaraq davam edir.

Səfirlik hesab edir ki, tarixi və hüquqi məsuliyyət Birləşmiş Krallıq və sonradan bu müstəmləkə prosesini dəstəkləyən ölkələrin üzərinə düşür, çünki bu ölkələr davam edən ədalətsizliyin yaranmasına töhfə vermiş tərəflərdir. Eyni zamanda səfirlik öz müqəddəratını təyin etmək, geri qayıtmaq və müstəqillik hüququnu təmin edən Birləşmiş Millətlər Təşkilatının qətnamələrinin həyata keçirilməsinin əhəmiyyətini vurğulayır.
Səfirlik Birləşmiş Krallığın 2025-ci ilin sentyabr ayında Fələstin Dövlətini rəsmi olaraq tanımaq addımını alqışlayır və bunu Balfur Bəyannaməsi ilə başlayan tarixi səhvi düzəltmək üçün düzgün istiqamətdə atılan addım hesab edir və İsrail işğalına son qoymaq üçün praktiki dəstək ilə onun tamamlanmasına çağırır.

Bu kontekstdə, Fələstin Dövlətinin Səfirliyi İsrailin işğal olunmuş Fələstin ərazisi üzərində heç bir suverenliyə malik olmadığını təsdiqləyir və İsrail işğalçı Knessetinin sözdə "İsrail suverenliyinin tətbiqi" adı altında Fələstin ərazilərini ilhaq etmək cəhdlərini ən sərt şəkildə pisləyir. Səfirlik xatırladır ki, işğal olunmuş Fələstin ərazisi, Qüds, Qəzza zolağı da daxil olmaqla, İordan çayının qərb sahilində vahid, bölünməz coğrafi vəhdət təşkil edir və Fələstin ərazisi üzərində suverenlik yalnız Fələstin xalqına və Fələstin Azadlıq Təşkilatı tərəfindən təmsil olunan legitim rəhbərliyə məxsusdur. Bu, təbii, tarixi və qanuni hüquqlara əsaslanır və beynəlxalq hüquq qaydalarına və müvafiq Birləşmiş Millətlər Təşkilatının qətnamələrinə uyğun olaraq həyata keçirilir.
Səfirlik həmçinin İsrailin qanunsuz işğalçı dövlət kimi yalan faktları əraziyə yeritmək cəhdlərinə qarşı xəbərdarlıq edir və bütün bu tədbirlərin hüquqi cəhətdən etibarsız olduğunu və beynəlxalq hüquqa əsasən işğal olunmuş ərazi olan Fələstin ərazisinin hüquqi statusunu dəyişdirmədiyini vurğulayır. Bu, Beynəlxalq Ədalət Məhkəməsi tərəfindən işğal qanununun Fələstin ərazisinə şamil edildiyini bildirən məsləhət rəyində də təsdiqlənmişdir.
Səfirlik, Fələstin xalqının hüquqlarını dəstəkləməyə davam edən ölkələrin və beynəlxalq təşkilatların, xüsusən də İsrail işğalının qeyri-qanuni olması bağlı Beynəlxalq Ədalət Məhkəməsinin verdiyi məsləhət rəyini dəstəkləyən ölkələrin prinsipial mövqelərini yüksək qiymətləndirir və bu mövqeyin işğala son qoyan və ədalət və hesabatlılığa əsaslanan beynəlxalq sistemi möhkəmləndirən praktik tədbirlərə çevrilməsinin vacibliyini vurğulayır.
Fələstin Dövlətinin Azərbaycan Respublikasındakı Səfirliyi xalqımız azadlığına və müstəqilliyinə nail olana və paytaxtı Şərqi Qüds olmaqla 4 iyun 1967-ci il sərhədlərində müstəqil dövləti qurulana qədər Fələstinin haqlı mübarizəsinə dəstəyi artırmaq üçün Azərbaycandakı tərəfdaşları və beynəlxalq ictimaiyyətlə işləməyə davam etmək öhdəliyini bir daha təsdiq edir.

Reportyor.az





KARUSEL / SİYASƏT