"School of Leadership Afghanistan" (SOLA) təşkilatının təsisçisi Şəbana Basic-Rasix Böyük Britaniyanın Oksford Universitetində magistratura təhsili alan əfqan qadınlara dəstək məqsədilə 2,5 milyon dollarlıq daimi fondun yaradıldığını elan edib.

Təqaüd proqramının 2027-ci ilin sentyabrında fəaliyyətə başlaması və hər il azı bir əfqan qadının təhsilini maliyyələşdirməsi nəzərdə tutulur. Fond təhsil haqqı, yaşayış yeri, gündəlik xərclər və digər zəruri ehtiyaclar daxil olmaqla, təhsilin bütün xərclərini qarşılayacaq.

Təqaüdçülər həmçinin Oksfordun "Weidenfeld-Hoffmann Trust" təşkilatı vasitəsilə liderlik bacarıqlarının inkişafı imkanlarından yararlana biləcəklər.

Basic-Rasix Böyük Britaniya vizalarının alınması ilə bağlı mövcud məhdudiyyətlərə toxunaraq, bu təşəbbüsün siyasi bəyanat kimi qiymətləndirilməməli olduğunu bildirib. O, həmçinin vurğulayıb ki, sözügedən fond SOLA-nın əməliyyat büdcəsindən ayrıdır.

SOLA Ruandadakı internat məktəbi və "SOLAx" adlı onlayn tədris proqramı vasitəsilə əfqan qızların təhsilinə dəstək verir. Bu təşəbbüslər birlikdə 40 000-dən çox tələbəyə təhsil imkanları yaradır.

Bu təqaüd proqramı Əfqanıstanda qızların və qadınların təhsilə çıxışına qoyulan məhdudiyyətlərin davam etdiyi bir dövrdə elan olunub. Proqram əfqan qadınlara beynəlxalq səviyyədə tanınmış universitetdə ali təhsil almaq və eyni zamanda liderlik bacarıqlarını inkişaf etdirmək üçün imkan yaratmağı hədəfləyir.

Reportyor.az 




KARUSEL / DÜNYA