Cənubi Koreya, ABŞ və Yaponiya Şimali Koreya təhdidlərinə qarşı üçtərəfli təhlükəsizlik əməkdaşlığını gücləndirmək məqsədilə çərşənbə axşamı birgə hava təlimləri keçirib.

Reportyor.az xəbər verir ki, Cənubi Koreyanın Yonhap Xəbər Agentliyi Cənubi Koreya Hərbi Hava Qüvvələrindən verilən açıqlamaya istinadən izah edib ki, bu, prezident Li Jae Myungun bu ayın əvvəlində vəzifəyə başlamasından sonra üç ölkə arasında ilk birgə hava təlimidir.

“Təlimlər Şimali Koreyanın irəliləyən nüvə və raket təhdidlərinin qarşısını almaq, Koreya yarımadasında və regionda sülh və sabitliyi qorumaq üçün Cənubi Koreya-ABŞ-Yaponiya təhlükəsizlik əməkdaşlığını gücləndirmək məqsədilə keçirilib”, - deyə məlumatda bildirilir.

Cənubdakı Ceju adasının suları üzərində keçirilən hava təliminə Cənubi Koreyaya məxsus iki F-15K qırıcısı, ABŞ-ın altı F-16 qırıcısı və iki Yaponiya F-2 qırıcısı iştirak edib.

Hərbi Hava Qüvvələri Cənubi Koreya-ABŞ möhkəm ittifaqı əsasında bu cür üçtərəfli təlimləri davam etdirməyi planlaşdırdığını bildirib. Üç ölkə sonuncu dəfə yanvarın 15-də ABŞ-ın iki B-1B bombardmançı təyyarəsinin iştirakı ilə birgə hava təlimləri keçirib.



KARUSEL / DÜNYA