Şanxay Əməkdaşlıq Təşkilatına (ŞƏT) üzv ölkələrin liderləri ötən həftə qəbul etdikləri bəyannamədə Əfqanıstanda inklüziv hökumətin formalaşmasına çağırıb.

“ToloNews”un xəbərinə görə, liderlər bildirib ki, ŞƏT regionunda təhlükəsizliyin və sabitliyin qorunub saxlanılması və möhkəmləndirilməsinin ən mühüm amillərindən biri Əfqanıstandakı vəziyyətin tezliklə nizamlanmasıdır.

ŞƏT üzvləri Əfqanıstanın müstəqil, neytral, vahid, demokratik və dinc, terrorizmdən, müharibədən və narkotiklərdən azad dövlət kimi qurulmasını dəstəkləyir.

Bəyannamədə bildirilir ki, üzv dövlətlər Əfqanıstanda “əfqan cəmiyyətinin bütün etnik, dini və siyasi qruplarının nümayəndələri ilə” inklüziv hökumətin olmasının vacib olduğuna inanırlar.

İştirakçılar regional və qonşu dövlətlərin əfqan qaçqınlarına göstərdiyi uzunmüddətli qonaqpərvərliyin və səmərəli yardımın dəyərini vurğulayaraq, onların öz vətənlərinə ləyaqətli, təhlükəsiz və davamlı qayıdışının asanlaşdırılmasında beynəlxalq ictimaiyyətin fəal iştirakını vacib hesab edirlər.

Əfqanıstan Milli Həmrəylik Hərəkatının rəhbəri Sayed İshaq Qaylani deyib ki, Əfqanıstanın etnik qrupları bu hökumətə daxil deyil. Onların şikayətləri var; buna görə də onlar Əfqanıstanı tərk edirlər: “Bu, beynəlxalq ictimaiyyətin və Əfqanıstan xalqının tələblərinə uyğunlaşmasa, böyük problemlərlə üzləşəcək hökumət üçün ağır nəticələrə səbəb olacaq”.

Beynəlxalq münasibətlər üzrə analitik Nemətullah Bizhan deyib ki, region ölkələri başa düşüb ki, Əfqanıstan bu istiqamətdə getməsə, vətəndaş müharibəsi və davam edən böhranla üzləşəcək.

İslam Əmirliyi hələlik bununla bağlı heç bir açıqlama verməyib, lakin o, daim hökumətinin əhatəli olduğunu vurğulayır və beynəlxalq ictimaiyyətin çağırışını Əfqanıstanın daxili işlərinə müdaxilə adlandırır.

Reportyor.az