Avropa liderlərinin Türkiyə Prezidenti Rəcəb Tayyib Ərdoğanın beşli formatda (Ermənistan-Azərbaycan-Fransa-Almaniya-Avropa İttifaqı) görüşə qatılmasına etirazları qəbuledilməzdir.
Bunu Türkiyənin Ədalət və İnkişaf Partiyasının (AK Partiya) sözçüsü Ömər Çelik mətbuat konfransında deyib: "Fransa kimdir? Fransa ATƏT-in Minsk qrupu içərisində 30 il problemi həll etməyən ölkədir. O masada Fransa oturacaq, amma regionda sülh üçün töhfə verən Türkiyə olmayacaq. Təbii ki, bu Azərbaycan Prezidenti İlham Əliyev tərəfindən qəbuledilməzdir.  Qarabağ öz sahiblərinə qayıdıb. Bu gün Fransa diplomatiyası Ermənistanın işğalçı olduğunu dilə gətirmir. Bunu belə edə bilməyənlər guya orada sülh masası quracaqlar".
AK Parti nümayəndəsi əlavə edib ki, beynəlxalq ictimaiyyət sülh istəsəydi, Türkiyənin görüşdə iştirakında maraqlı olardı.

Xatırladaq ki, Prezident İlham Əliyev Avropa İttifaqı (Aİ), Fransa və Almaniya liderlərinin iştirakı ilə Ermənistanın baş naziri Nikol Paşinyanla görüşün keçirilməli olduğu İspaniyaya (Qranada şəhərinə) getməkdən imtina edib. Buna səbəb Fransanın destruktiv mövqeyi, eləcə də Paris və Berlinin Türkiyənin toplantıda iştirakı ilə bağlı fikir ayrılığıdır. Belə bir şəraitdə Azərbaycan tərəfi danışıqlar aparmaqdan imtina edib.


KARUSEL / GÜNDƏM