Səudiyyə Ərəbistanı və Qətərin Körfəz ölkələrində bomba yerləşdirən Mossad agentlərini həbs etməsi iddiaları əsassız və yalandır.

Əl-Ərəbiyyə bunu öyrəndiyi öz mənbələrinə istinadən xəbər verir. 

İddialar ABŞ jurnalisti və aparıcısı Taker Karlsonun iki Körfəz qonşusunun "bu ölkələrdə bomba yerləşdirməyi planlaşdıran İsrail Mossad agentlərini həbs etdiyini" söyləməsindən sonra geniş yayılmağa başlayıb.

"İsraillilər niyə İranın da hücumuna məruz qalan Körfəz ölkələrində bombalar törətməlidirlər? Onlar eyni tərəfdə deyillərmi?" deyə Karlson bazar ertəsi günü ABŞ prezidenti Donald Trampın İrana hücum qərarını tənqid edən verilişinin bir bölümündə soruşub.

"İsrail İrana, Qətərə, BƏƏ-yə, Səudiyyə Ərəbistanına, Bəhreynə, Omana və Küveytə zərər vermək istəyir", deyə o əlavə edib.

İddialardan sonra Qətər Xarici İşlər Nazirliyi çərşənbə axşamı verdiyi açıqlamada ölkədə fəaliyyət göstərən belə Mossad hücrələri barədə heç bir məlumata malik olmadığını bildirib.


Reportyor.az 



KARUSEL / DÜNYA