Özbəkistanın aparıcı rəqəmsal platforması olan Uzum, Oman Sultanlığının suveren sərvət fondlarından 130 milyon dollardan çox vəsait cəlb edərək strateji investisiya raundunu başa vurub.

Bu barədə Özbəkistan mediası şirkətə istinadən məlumat verib.

Raundda şirkətin mövcud investorları - VR Capital, Tencent və FinSight Ventures də iştirak edirdi. Uzum-un yeni qiymətləndirmə hədəfi 2,3 milyard dollar olaraq müəyyən edilib.

Vəsaitlər şirkətin ekosisteminin əsas sahələrinin - elektron ticarət, rəqəmsal bankçılıq və ödəniş xidmətlərinin inkişafına yönəldiləcək.

Hazırda Özbəkistanın 20 milyondan çox sakini Uzum-un xidmətlərindən aylıq istifadə edir və investisiya onun texnoloji infrastrukturunu genişləndirəcək, rəqəmsal xidmətlərin əlçatanlığını artıracaq və ölkənin regionlarında əhatə dairəsini genişləndirəcək.

Bu raund beynəlxalq investorların Özbəkistanın rəqəmsal bazarına artan marağını təsdiqləyir və Uzum-un ölkənin innovativ iqtisadiyyatında lider kimi mövqeyini gücləndirir.


Reportyor.az 


KARUSEL / İQTİSADİYYAT