İndoneziya parlamentinin yuxarı palatası dekabrın 2-də ölkənin yeni vitse-prezidentini seçəcək. Bu barədə cümə günü palata sədri məlumat verib. Qərar, prezidentin müavini və sələfinin oğlu olan Gibran Rakabuming Rakanın gözlənilməz istefasından sonra qəbul edilib.

Reuters bu barədə məlumat verib. 

Gibranın bu həftə verdiyi istefa – hansı ki, təhlilçilərin fikrincə, Prezident Prabovo Subianto ilə sabiq prezident Joko Vidodo arasındakı uçurumu daha da dərinləşdirə bilər – qanunvericilər tərəfindən bir aydır davam edən artan siyasi təzyiqlərin ardınca baş verib. Belə ki, İndoneziyanın ali məhkəmə orqanları onun bu vəzifəyə namizədliyini irəli sürmək üçün tələb olunan təhsil səviyyəsinə malik olmadığına dair qərar çıxarmışdı.

Palata sədri Əhməd Muzani bildirib ki, qanunvericiliyə əsasən yeni vitse-prezidenti təyin etmək səlahiyyətinə malik olan yuxarı palata, Prezident Prabovoya məktub göndərərək ondan bu vəzifə üçün iki namizəd təqdim etməsini xahiş edəcək.

Muzaninin sözlərinə görə, palata həmçinin namizədlərin sənədlərini və ixtisas uyğunluğunu yoxlamaq üçün 36 qanunvericidən ibarət xüsusi qrup yaradıb. Prabovonun hansı şəxslərin adını təqdim edəcəyi hələlik məlum deyil.

Cümə axşamı günü Gibran bəyan edib ki, istefa qərarı şəxsi xarakter daşıyır və onun təhsil sənədləri ilə bağlı məsələlərə heç bir aidiyyəti yoxdur.

39 yaşlı Gibran 2024-cü il seçkilərində Prabovo ilə birlikdə seçilmişdi. Tənqidçilər onun atası Vidodonu (daha çox "Cokovi" kimi tanınır) seçki qaydalarını dəyişən məhkəmə qərarına təsir etməkdə və bununla da Gibranın namizədliyini irəli sürməsinə şərait yaratmaqla seçki prosesinə müdaxilə etməkdə ittiham edirdilər.

Analitiklər hesab edirlər ki, Gibranın istefası siyasi qarışıqlığı daha da artıra və Jokovi ilə Prabovonu sərt bir rəqabətə sürükləyə bilər.

Jokovi 2014 və 2019-cu illərdə keçirilən iki prezident seçkisində Prabovonu məğlub etmişdi. Jokovi özünün ikinci prezidentlik müddətində Prabovonu müdafiə naziri təyin etdi və onun 2024-cü il prezident seçkilərindəki namizədliyini dolayısı ilə dəstəklədi.

Lakin cümə axşamı həm Jokovi, həm də Gibran barışcıl bir mövqe sərgiləyərək, Prabovonu dəstəkləməyə davam edəcəklərini bildirdilər.

Gibran, "Kompas TV" xəbər kanalında yayımlanan və könüllülərə ünvanlandığı video müraciətində qeyd etdi ki, Prabovo administrasiyasının bir hissəsi olmasa belə, müxalifətdə yer almayacaq.

"Mənim yalnız bir mesajım var: hökumətin daxilində və ya xaricində olmağımızdan asılı olmayaraq, biz prezidenti dəstəkləməyə davam etməliyik", - deyə o bildirdi.

Analitiklərə görə, Prabovo ilə Jokovi arasındakı uçurumun daha bir göstəricisi, keçən həftə polisin dörd yüksək rütbəli polis məmuruna qarşı qanunsuz dinləmə şübhəsi ilə bağlı araşdırma apardığını açıqlamasıdır. Bu şəxslər arasında, Jokoviyə sadiq biri kimi tanınan keçmiş polis rəisi Listyo Sigit Prabovo da var.

Polis cümə axşamı bəyan etdi ki, sözügedən dörd şübhəlinin Prabovonu, eləcə də digər siyasətçiləri, fəalları və jurnalistləri qanunsuz dinləməsi ilə bağlı onlarda dövlətə xəyanət ittihamı irəli sürmək üçün kifayət qədər ilkin sübutlar mövcuddur.


Reportyor.az 




KARUSEL / DÜNYA