Birləşmiş Millətlər Təşkilatının Ümumdünya Ərzaq Proqramının (ÜƏP) yeni icraçı direktoru, yüz minlərlə insanın aclıq təhlükəsi ilə üzləşdiyi Sudanda döyüşlərin dayandırılmasına çağırır.

Ölkə daxilində məcburi köçkünlər üçün nəzərdə tutulan "Qoz Əl-Salam" düşərgəsinə səfəri zamanı Lyuk C. Lindberq müharibəyə son qoymağa, həmçinin ÜƏP-in humanitar yardım fəaliyyətini genişləndirə bilməsi üçün ona göstərilən maliyyə dəstəyinin artırılmasına çağırıb.

ÜƏP-in bəyanatında bildirilir ki, təşkilat avqust ayında Sudanda 4 milyon insanı ərzaqla təmin edib.

Lakin maliyyə çatışmazlığı səbəbindən təşkilat yardımları azaltmaq məcburiyyətində qalıb və nəticədə 900 min insan köməksiz qalıb.

Təşkilat 2027-ci ilin aprelinə qədər 5,4 milyon insanı ərzaqla təmin etmək üçün 520 milyon dollar məbləğində ianə toplanmasına çalışır.

Sudanda müharibə 2023-cü ilin aprelində, ordu ilə "Sürətli Dəstək Qüvvələri" (RSF) arasındakı gərginliyin paytaxt Xartumda silahlı toqquşmalara çevrilməsi və daha sonra bütün ölkəyə yayılması ilə başlayıb.

BMT-nin məlumatına görə, bu münaqişə dünyanın ən böyük humanitar böhranına səbəb olub; hazırda təxminən 34 milyon insan – yəni hər üç sudanlıdan ikisi – yardıma ehtiyac duyur.

İki rəqib qüvvə tərəfindən Sudanın müxtəlif bölgələrində ölümcül pilotsuz uçuş aparatı (PUA) hücumları həyata keçirilib.

BMT Sudan ərazisində PUA-lardan istifadə olunması ilə bağlı narahatlığını ifadə edərək bildirib ki, bu hücumlar mülki şəxslərin, o cümlədən uşaqların ölümünə səbəb olur və həyati əhəmiyyətli xidmətlərin fəaliyyətini pozur.

Reportyor.az 



KARUSEL / DÜNYA