Cümə axşamı Vaşinqtonun mərkəzində, Ağ Evdən təxminən bir mil (1,6 km) aralıda baş verən atışma ilə əlaqədar polis hadisə yerinə cəlb olunub. Yerli rəsmi şəxsin məlumatına görə, idman zalında bir neçə nəfər güllələnib.

Vaşinqton polisi "X" sosial şəbəkəsində bildirib ki, ölkə paytaxtının "Logan Circle" ərazisində baş verən "aktiv atışma" ilə bağlı təcili müdaxilə qrupu hadisə yerindədir.

Vaşinqton Şəhər Şurasının üzvü Bruk Pinto bildirib ki, atışma idman zalının daxilində və xaricində baş verib, nəticədə bir neçə nəfər güllələnib.

Onun sözlərinə görə, polis hazırda şübhəli şəxsi axtarır.

Səhər saatlarında, insanların işə və ya digər yerlərə tələsdiyi ən qızğın vaxtda baş verən bu hadisə səbəbindən əraziyə çoxlu sayda polis qüvvəsi cəlb olunub. Sakinlərə həmin ərazidən uzaq durmaları tövsiyə edilib.

Hadisə yerinə müxtəlif hüquq-mühafizə orqanlarının əməkdaşlarının tələsdiyi müşahidə olunub.

"The Washington Sun" nəşri "VIDA Fitness" idman zalının bir üzvünün sözlərini sitat gətirib. Həmin şəxs atışma başlayanda idman zalında qaçış trenajorunda olduğunu bildirib.

Maykl Karni adlı şəxs "partıltı" səsi eşitdiyini, ardınca isə zalda başından güllələnmiş bir nəfəri gördüyünü söyləyib.

Karni "The Sun"a açıqlamasında deyib: "Hamı özünü bitki dibçəklərinin və digər əşyaların arxasında gizlətməyə çalışırdı".

Reportyor.az 



KARUSEL / DÜNYA