El Salvador prezidenti çərşənbə axşamı hərbi helikopterlərin Haitidəki ən güclü qruplaşmalardan birinin qərargahı olduğu iddia edilən məkana raket zərbələri endirdiyini əks etdirən video paylaşıb.

Prezident Nayib Bukele bildirib ki, onlar "400 Mawozo" qruplaşmasının lideri Vilson Cozefə (Wilson Joseph) məxsus evi məhv ediblər.

Daha çox "Lanmò San Jou" kimi tanınan Cozef bazar günü həyata keçirilən hücum zamanı öldürülməyib.

Haiti Baş naziri Aliks Didye Fils-Eme (Alix Didier Fils-Aimé) "X" sosial şəbəkəsində videoya münasibət bildirərək, "Salvador qüvvələrinin qruplaşmalara qarşı mübarizədəki əzmkarlığını alqışladığını" qeyd edib.

O, "Prezident Nayib Bukele, qruplaşmalara qarşı milli mübarizəyə verdiyiniz dəstəyə və göstərdiyiniz əzmkarlığa görə sizə təşəkkür edirəm", - deyə bildirib.

Kadrlarda helikopterlərin Haiti ərazisindəki evlərə ardıcıl zərbələr endirdiyi, havaya tüstü sütunlarının qalxdığı və kişilərin hədəf alınan binalardan qaçdığı görünür.

Bu hücum, Bukelenin "X" sosial platformasında Cozefin evinin yerini soruşmasından bir neçə gün sonra baş verib. Bir neçə istifadəçi cavab olaraq dəqiq koordinatları xatırladan məlumatlar paylaşıb.

Bukele görüntüləri paylaşarkən "Vədimizə əməl etdik", - deyə yazıb.

Haiti ilə birlikdə Karib dənizindəki Hispaniola adasını bölüşən Dominikan Respublikası çərşənbə axşamı bildirib ki, qruplaşmalara qarşı mübarizədə El Salvadorla əməkdaşlıq edir.

Dominikan Respublikasının Prezidenti Luis Abinader deyib: "Biz Prezident Bukele ilə əməkdaşlıq edir, ona logistika və kəşfiyyat məlumatları ilə dəstək veririk".

Abinader ortaq sərhədi dronlar, əsgərlər və zirehli texnikalar vasitəsilə izləməyə davam edəcəyinə, həmçinin ölkəsinin sabitliyinə təhdid yarada biləcək istənilən hərəkətə cavab verəcəyinə söz verib.

El Salvador, Birləşmiş Millətlər Təşkilatının (BMT) dəstəklədiyi missiyada çalışan dörd aviasiya texnikinin oktyabrın 18-də qruplaşmaların nəzarətində olan ərazidə hücuma məruz qalmasından sonra Haitiyə qoşun göndərib.

Onların taleyi hələ də məlum deyil.

O vaxtdan bəri El Salvador Haitiyə 2500 əsgər yerləşdirib, lakin onların həyata keçirdiyi əməliyyatlar barədə ictimaiyyətə çox az məlumat verilib.

Salvador qüvvələri əsasən BMT-nin dəstəklədiyi "Qruplaşmalara qarşı mübarizə üzrə çoxmillətli qüvvələr"in (Multinational Gang Suppression Force) çərçivəsindən kənarda fəaliyyət göstərir ki, bu da döyüş qaydaları və koordinasiya ilə bağlı narahatlıqlar doğurur. Haiti illərdir ki, effektiv dövlət hakimiyyətinin uzun müddət mövcud olmaması fonunda öz nəzarət dairəsini genişləndirən güclü silahlı qruplaşmalarla mübarizə aparır.


Reportyor.az 

KARUSEL / DÜNYA