İran Xarici İşlər Nazirliyi çərşənbə günü bildirib ki, Tehran Argentina hərbi-dəniz və hərbi-hava qüvvələrini “terror təşkilatları” kimi tanıyıb. Bu addım, Buenos-Ayresin aprel ayında İran İslam İnqilabı Keşikçiləri Korpusunu (İİKK) - SEPAH-ı terror təşkilatı elan etməsinə cavab olaraq atılıb.

Argentina, ABŞ Prezidenti Donald Tramp administrasiyasının müttəfiqlərinə etdiyi çağırışdan sonra İİKK-ni terror təşkilatı kimi tanımışdı.

İran Xarici İşlər Nazirliyinin çərşənbə günü yaydığı bəyanatda deyilir ki, Tehran “qarşılıqlılıq prinsipinə əsaslanaraq” Argentina hərbi-hava və hərbi-dəniz qüvvələrini terror təşkilatları hesab edir.

Nazirlik əlavə edib ki, “bu məsələdən irəli gələn bütün nəticələrə görə məsuliyyət Argentina hökumətinin üzərinə düşür”. Nazirlik bununla bağlı əlavə təfərrüat verməyib. Bəyanatda Argentina ordusu barədə heç bir qeyd yoxdur.

Argentina aprel ayında bildirmişdi ki, İİKK-yə qarşı atdığı bu addım onun Livanda yerləşən “Hizbullah” qruplaşmasına dəstək verməsi ilə bağlıdır. Buenos-Ayres 1994-cü ildə Argentina paytaxtındakı AMIA yəhudi icma mərkəzinə edilən və 85 nəfərin ölümü, yüzlərlə insanın yaralanması ilə nəticələnən hücuma görə məhz “Hizbullah”ı günahlandırır; bu, Cənubi Amerika ölkəsi tarixində baş vermiş ən qanlı partlayış hesab olunur.

İİKK İranın iqtisadiyyatının böyük hissəsinə nəzarət edən elit hərbi qüvvədir.

Reportyor.az 


KARUSEL / DÜNYA