İslamabad Ali Məhkəməsi (İAM) çərşənbə axşamı günü vəkillər Lətif Xosa və Salman Səfdərin Adiala həbsxanasında "Pakistan Təhrik-e-İnsaf" (PTI) partiyasının təsisçi sədri İmran Xan və onun həyat yoldaşı Buşra Bibi ilə görüşmələrinə icazə verilməsi barədə qərar qəbul edib.

Baş prokuror bildirib ki, əgər vəkillər məhkəməyə növbəti iclasda apellyasiya şikayətləri üzrə arqumentlərin təqdim olunacağına dair zəmanət versələr, bu görüşlər təşkil oluna bilər.

Pakistan yerli mediası bu barədə məlumat verib. 

İAM-ın Baş hakimi Sərdar Məhəmməd Sərfraz Doqar və hakim Məhəmməd Asifdən ibarət məhkəmə heyəti, İmran və Buşranın 190 milyon funt-sterlinqlik iş üzrə çıxarılan hökmlərə qarşı verdikləri apellyasiya şikayətlərinə baxarkən bu göstərişləri veriblər.

Daha əvvəl İslamabaddakı korrupsiya işlərinə baxan məhkəmə (hesabatlılıq məhkəməsi) keçmiş baş naziri 14 il müddətinə azadlıqdan məhrum edib və 1 milyon rupi məbləğində cərimələyib; keçmiş birinci xanım isə 7 il müddətinə azadlıqdan məhrum edilib və 500 min rupi cərimə olunub.

Bu gün keçirilən iclasda vəkil Xosa məhkəməyə bildirib ki, o, dəfələrlə İmranla görüşmək istəsə də, buna icazə verilməyib.

Bunun üzərinə, İAM-ın Baş hakimi Xosadan görüşün nə qədər davam etməsini istədiyini soruşub. Xosa ən azı bir saat vaxt istəyib, bundan sonra məhkəmə İslamabadın baş vəkilinə (advocate general) İmran və Buşra ilə görüşün təşkil olunması barədə göstəriş verib.

İmranın vəkili, barrister Salman Səfdər də əlavə görüş xahiş edərək bildirib ki, PTI-nin təsisçisi ilə əvvəlki görüşündə müəyyən təlimatlar alsa da, bu, kifayət etməyib. O, məhkəməyə bildirib ki, İmranla 7 aydan, Buşra Bibi ilə isə 11 aydan sonra görüşə bilib.

İslamabad Ali Məhkəməsinin (IAM) baş hakimi hazırlıq üçün vaxt verdi və Xosadan növbəti iclasda 190 milyon funt-sterlinqlə bağlı iş üzrə arqumentlərini təqdim etməyə başlamasını istədi.

"Əl-Qadir Trust" işi

Ümumiyyətlə "190 milyon funt-sterlinqlik iş" kimi tanınan "Əl-Qadir Trust" işi, İmran Xanın baş nazir olduğu dövrdə — 2019-cu ildə — onun və digər şəxslərin Böyük Britaniyanın Milli Cinayətkarlıq Agentliyi (NCA) tərəfindən Pakistan hökumətinə göndərilən 50 milyard rupi (həmin vaxtkı məzənnə ilə 190 milyon funt-sterlinq) məbləğindəki vəsaitlə bağlı hərəkətləri ilə əlaqədardır.

Söhbət gedən vəsait, PTI-nin (İmran Xanın partiyası) hakimiyyəti dövründə NCA tərəfindən müsadirə edilmiş bir daşınmaz əmlak maqnatının aktivləri ilə bağlıdır. Britaniya agentliyi o vaxt bildirmişdi ki, bu vəsait Pakistan hökumətinə verilməli idi, çünki həmin daşınmaz əmlak maqnatı ilə əldə olunan razılaşma "mülki xarakterli məsələdir və təqsirliliyin təsdiqi hesab olunmur".

Bununla belə, Milli Hesabatlılıq Bürosu (NAB) 2023-cü ilin dekabrında iş üzrə materialları məhkəməyə təqdim etdi. Ardınca, 27 fevral 2024-cü ildə İmran Xan və Buşraya qarşı ittihamlar irəli sürüldü. İttihama əsasən, Britaniya agentliyi ilə razılaşma 3 dekabr 2019-cu ildə, o vaxtkı baş nazir İmran Xan tərəfindən təsdiqlənib, lakin bu məxfi razılaşmanın təfərrüatları açıqlanmayıb.


Reportyor.az 




KARUSEL / DÜNYA