Birləşmiş Ərəb Əmirliklərinin (BƏƏ) yüksək vəzifəli rəsmisi cümə günü bildirib ki, bu həftə İsrailə uçan "flydubai" reysində baş verən insident "terror aktı" olub. O, ikinci pilotun hücumuna məruz qaldıqdan sonra təyyarənin qəzaya uğramasının qarşısını almağa kömək edən kapitanı yüksək qiymətləndirib.

Prezidentin müşaviri Ənvər Qarqaş "X" sosial şəbəkəsində yazıb ki, Hindistan vətəndaşı Smit Maççar "əsl qəhrəman"dır və "hər cür təqdirə" layiqdir.

Qarqaş qeyd edib: "Ciddi terror aktı və potensial fəlakətlə üzləşərkən o, cəsarət və məsuliyyətin əsl mənasını nümayiş etdirdi".

İkinci pilotun bıçaqla hücumuna məruz qalan kapitanın idarə etdiyi və göyərtəsində 174 nəfərin olduğu təyyarə Səudiyyə Ərəbistanında təcili eniş etməyə məcbur olub.

İnsidentin dəqiq təfərrüatları və hücumçunun motivləri Birləşmiş Ərəb Əmirliklərində araşdırılır; hər iki şəxs artıq həmin ölkəyə təhvil verilib.

Qarqaş vurğulayıb: "Ekstremizm və terrorizm təhlükələri qarşısında sayıqlıq və ehtiyatlılıq vacib olaraq qalır".

Hadisədən sonra ilk dəfə ictimaiyyətə açıqlama verən Maççar cümə günü bildirib ki, hücum zamanı kabinə qapısının kilidini açmaq üçün "son bir cəhd" edib və bu, sərnişinlərin və ekipaj üzvlərinin müdaxilə edərək təyyarəyə nəzarəti bərpa etmələrinə imkan yaradıb.

Təyyarədə əsasən İsrail vətəndaşı olan sərnişinlər var idi və uçuş zamanı heyət səkkiz nəfərdən ibarət olub.


Reportyor.az 



KARUSEL / DÜNYA