Yəmən Prezident Rəhbərlik Şurasının sədri Rəşad əl-Alimi bazar ertəsi günü "Yəmən Sübhü" əməliyyatına start verdi. Bu addım, İranın dəstəklədiyi Husi milislərinə qarşı hərbi əməliyyatların başladığının elan edilməsindən bir gün sonraya təsadüf edir; əməliyyatın məqsədi husilərin nəzarətində qalan əraziləri geri qaytarmaq və ölkə miqyasında dövlət hakimiyyətini bərpa etməkdir.

Bu barədə ərəb mediası xəbər verir. 

Əl-Alimi bildirdi ki, əməliyyat dövlət qurumlarının bərpası, paytaxt Sənanın azad edilməsi və Husi terrorçu milislərinin həyata keçirdiyi çevrilişə son qoyulması məqsədi daşıyır.

Əl-Alimi "X" sosial şəbəkəsindəki paylaşımında qeyd edib: "Allahın köməyi, xalqımızın iradəsi, silahlı qüvvələrimizin və bütün hərbi birləşmələrin şücaəti, həmçinin qardaş və dostlarımızın dəstəyi ilə Yəmən azadlıq, sülh və sabitlikdən ibarət yeni bir sübhə doğru irəliləyəcək".

Əməliyyata başlanılması Yəmən hökumət qüvvələrinin bazar ertəsi günü əldə etdiyi irəliləyişlər fonunda baş tutub.

Hərbi mənbələrin məlumatına görə, "Nəhənglər Briqadaları" (Giants Brigades) və "Millət Qalxanı" (Nation’s Shield) qüvvələri bazar ertəsi günü strateji əhəmiyyətli Bab əl-Məndəb boğazına nəzarət edən mövqedə yerləşən Husi mövqelərinə hücum ediblər.

Yəmənin dövlət xəbər agentliyi təsdiqləyib ki, xalq müqavimət qüvvələri tərəfindən dəstəklənən "Millət Qalxanı" qüvvələri və "Nəhənglər Briqadaları" Dhubab rayonunu və Bab əl-Məndəb boğazı ətrafındakı strateji mövqeləri azad ediblər.

Yəmən silahlı qüvvələrinin sözçüsü Macid əl-Nuzeyli "X" platformasında bildirib ki, qüvvələr "Yəmən Sübhü" əməliyyatının genişmiqyaslı icrasına başlayıblar; o, hər iki qruplaşmanın Bab əl-Məndəbə nəzarəti ələ keçirdiyini və Dhubab hava limanının artıq hökumət qüvvələrinin nəzarətində olduğunu qeyd edib.

Əl-Nuzeyli bildirib ki, yüzlərlə Husi döyüşçüsü Dhubab bölgəsində mühasirəyə alınıb və onlar hökumət qüvvələrinə təslim olmalıdırlar.

Yəmən ordusu bazar ertəsi səhər saatlarında Husi hədəflərinə qarşı genişmiqyaslı zərbələr endiriləcəyini elan etmişdi.

Əl-Nuzeyli qüvvələrin Husilərə məxsus "artilleriya və raket qurğusu mövqeləri, müdafiə istehkamları, yaxınlaşma və əlavə qüvvə marşrutları, təchizat xətləri və logistika vasitələri, eləcə də döyüş üçün gətirilən əlavə qüvvələr"ə qarşı 1000-dən çox zərbə endirdiyini açıqlamışdı.

Reportyor.az 




KARUSEL / DÜNYA