Çinli milyarder və “Alibaba Group”un həmtəsisçisi Cek Ma gözlənilmədən Pakistan səfəri ilə müşahidəçilər arasında ajiotaj yaradıb.

“Express Tribune” qəzetinin yazdığına görə, İnvestisiya Şurasının (BOI) keçmiş sədri Muhammad Azfar Ahsan səfərini təsdiqləyərək Ma-nın iyunun 29-da Lahora gəldiyini və 23 saat qaldığını bildirib.
Cek Ma səfər zamanı hökumət rəsmiləri və media ilə ünsiyyətdən qaçıb. O, özəl bir yerdə qalıb və iyunun 30-da Jet Aviationa məxsus VP-CMA adı altında qeydiyyatdan keçmiş şəxsi təyyarəsi ilə gedib.
C.Manın səfərinin məqsədi bu nöqtədə məxfi olaraq qalsa da, Ahsanın sözlərinə görə, onun yaxın günlərdə Pakistan üçün müsbət nəticələr verəcəyinə ümid var.
Manı beş Çin vətəndaşı, bir Danimarka vətəndaşı və bir ABŞ vətəndaşından ibarət yeddi iş adamından ibarət nümayəndə heyəti müşayiət edib. Onlar Honq-Konqun biznes aviasiya sektorundan çarter reysi ilə Nepaldan Pakistana gəlib.
Sosial mediada Ma və komandasının Pakistanda biznes imkanlarını araşdırması, o cümlədən ticarət mərkəzlərinə səfərlər və müxtəlif ticarət palatalarının tanınmış iş adamları və rəsmiləri ilə görüşlər keçirməsi ilə bağlı müxtəlif fərziyyələr yayılıb. Bununla belə, hər hansı konkret işgüzar sövdələşmələr və ya görüşlərlə bağlı heç bir təsdiq yoxdur.


KARUSEL / DÜNYA