Həyat sübut edir ki, medianın seçki prosesində iştirakı seçkilər elan olunandan sonra başlayır.
Bunu bərabər seçkiqabağı təşviqat imkanları və media subyektlərinin prezident seçkilərində fəaliyyətinin əsaslarına həsr olunan müşavirədə MSK üzvü Fuad Cavadov deyib.
O bildirib ki, media namizədlərin yox, seçkilərin təşviqatında bu və ya digər formada iştirak edir:
“Seçkilər zamanı mediada gedən informasiyalar birbaşa seçki fəallığına təsir edən faktorlardan biridir. Eyni zamanda təşviqat kampaniyası başlayandan sonra medianın namizədi təşviq etməsi nəticəsində media öz namizədini seçir. Qanun konkret olaraq təşviqatla məşğul olan dairəni müəyyən edir.
Qanunda konkret olaraq təşviqatla məşğul ola bilməyən dairələrin də subyektləri müəyyən olunub. Xarici KİV, QHT-lər, kapitalının 30 %-i xarici şirkətə məxsus olan Azərbaycanda olan qurumlar da təşviqatla məşğul ola bilməz. Eyni zamanda təşviqat aparanlar və mətbuat orqanları ilə bağlı da məhdudiyyətlər var”.
O xatırladıb ki, 6 fevral 2024-cü ildə təşviqat prosesi başa çatacaq və xalqa bir gün sükut veriləcək: “Həmin gün xalq kimə səs verəcəyinə qərar verməlidir”.
MSK üzvü sosial şəbəkələrin həyatımıza kifayət qədər daxil olduğunu qeyd edib: “Vaxtından əvvəl təşviqat kampaniyasına başlanılmamalıdır. Eyni zamanda, 18 yaşına çatmamış vətəndaşlar da təşviqatla məşğul ola bilməzlər”.


KARUSEL / SİYASƏT