Bazar ertəsi beynəlxalq aviaşirkətlər İranın İsrail istiqamətinə PUA və raketlər atmasından sonra uçuşlarda fasilələrlə üzləşib.
Bu barədə “Reuters” məlumat yayıb.
Agentlik bildirir ki, “Qantas”, “Lufthansa”, “United Airlines” və “Air India” da daxil olmaqla, ondan çox aviaşirkət son iki gündə uçuşları ləğv etməli və ya marşrutu dəyişməli olub.
Uçuşların idarə edilməsi üzrə konsaltinq firması OPSGROUP-un təsisçisi Mark Zeenin sözlərinə görə, bu, 11 sentyabr 2001-ci ildə Dünya Ticarət Mərkəzinə edilən hücumlardan sonra hava nəqliyyatında ən böyük pozuntu idi: "O vaxtdan bəri bir çox fərqli hava məkanının bu qədər tez bağlandığı və xaos yaratdığı bir vəziyyətlə üzləşməmişik". Gözlənilir ki, bu problemlər daha bir neçə gün davam edəcək.
İranın hava məkanından hava yolları şirkətləri Avropa və Asiya arasında uçuşlar üçün istifadə edir və bu daşıyıcılar iki alternativ marşrutdan istifadə edə bilərlər - ya Türkiyə, ya da Misir və Səudiyyə Ərəbistanı.
İsrail şənbə günü hava məkanını bağladı, bazar günü səhər isə yenidən açdı. İordaniya, İraq və Livan da öz əraziləri üzərində uçuşları bərpa edib. “Emirates Airlines”, “Qatar Airways” və “Etihad Airways” də daxil olmaqla Yaxın Şərqin ən böyük hava yolları şirkətləri bazar günü bəzi uçuşları ləğv etdikdən və ya marşrutu dəyişdirdikdən sonra bölgədəki fəaliyyətlərini bərpa edəcəklərini bildiriblər. (“AzPolitika.info”)


KARUSEL / GÜNDƏM