Hindistan rəsmiləri bildiriblər ki, Əfqanıstandan Hindistana heroin və metamfetamin qaçaqmalçılığında ittiham olunan və axtarışda olan narkotik şəbəkəsi lideri Türkiyədən deportasiya edilərək ölkəyə gətirilib.

Hindistanın Daxili İşlər Naziri Amit Şah həftə sonu açıqlayıb ki, "Nav" kimi də tanınan Navprit Sinx Hindistan hakimiyyət orqanları tərəfindən yeri müəyyən edildikdən sonra Türkiyədən deportasiya olunub.

Şah bildirib ki, Sinx "Navab Virk" saxta şəxsiyyət məlumatlarından istifadə edərək Türkiyə vətəndaşlığı əldə edib və Əfqanıstandan Hindistana heroin və metamfetamin qaçaqmalçılığını davam etdirib.

Pəncab əsilli 34 yaşlı şəxs narkotik vasitələrlə bağlı bir neçə iş üzrə axtarışda idi və iki ildən çoxdur ki, gizlənirdi. Hindistan rəsmilərinin iddiasına görə, o, Hindistandakı fəaliyyəti əmisi oğlu Prabhdip Sinx tərəfindən idarə olunan beynəlxalq narkotik sindikatına rəhbərlik edirdi.

"Harri" kimi də tanınan Prabhdip Sinx 2021-ci ildə 358 kiloqram heroinin ələ keçirilməsi ilə bağlı iş çərçivəsində may ayında Azərbaycandan Hindistana ekstradisiya edilmişdi.

İşlə tanış olan rəsmilərin məlumatına görə, Hindistan Navprit Sinxin ekstradisiyası ilə bağlı sorğunu Türkiyə hakimiyyətinə 2023-2024-cü illərdə təqdim edib.

Şah, Sinxin deportasiyasını "tarixi mərhələ" kimi qiymətləndirib və Hindistan hökumətinin narkotik qaçaqmalçılığı şəbəkələrini məhv etməkdə qərarlı olduğunu bildirib.

Hindistanın Daxili İşlər Nazirliyi qeyd edir ki, xaricdəki axtarışda olan cinayətkarların geri gətirilməsi istiqamətindəki səylər çərçivəsində 2019-cu ildən 2026-cı ilin avqustuna qədər olan dövrdə 36 ölkədən 288 nəfər axtarışda olan şəxs Hindistana qaytarılıb.


Reportyor.az 




KARUSEL / DÜNYA