AirAsia-nın həmtəsisçisi Toni Fernandes Singapore Airlines-ın təyyarədaxili yeməklərini tənqid edərək və onların öz aviaşirkətinin təklif etdiyi yeməklərdən geri qaldığını bildirərək internetdə müzakirələrə yol açıb.

"South China Morning Post"un məlumatına görə, Fernandes Singapore Airlines-ın xidmətini və internet bağlantısını yüksək qiymətləndirsə də, təyyarədaxili yeməkləri "keyfiyyətsiz" adlandırıb.

Onun oktyabrın 1-də paylaşdığı yazıya yeməyin şəkli də əlavə olunmuşdu; şəkildə mal əti və tərəvəzlə birlikdə verilən, qırmızı souslu əriştə görünürdü.

Daha sonra o, AirAsia-nın bort iaşə brendi olan "Santan"ı tərifləyərək onu "qat-qat üstün" adlandırıb və Singapore Airlines-ın kabin heyətinin də bu fikirlə razılaşdığını iddia edib.

Yeməklə bağlı tənqidlərinə baxmayaraq, Fernandes uçuşu "əla" adlandırıb və AirAsia-nın səviyyəsinin Singapore Airlines-dan "çox da geri qalmadığını" bildirib.

Singapore Airlines-ın sözçüsü "AsiaOne"a açıqlamasında bildirib ki, aviaşirkət "bütün müştəri rəylərini məmnuniyyətlə qarşılayır və qiymətləndirir", həmçinin ümumi müştəri təcrübəsinin təkmilləşdirilməsinə və bu sahəyə sərmayə qoymağa sadiq qalır.

Fernandesin bu fikirləri Singapore Airlines-ın "Skytrax World Airline Awards" mərasimində altıncı dəfə "Dünyanın Ən Yaxşı Aviaşirkəti" seçilməsindən iki həftədən az müddət sonra səslənib.

Aviaşirkət həmçinin "Asiyanın Ən Yaxşı Aviaşirkəti", "Dünyanın Ən Yaxşı Ekonom Sinfi" və "Dünyanın Ən Yaxşı Ekonom Sinif Bort İaşəsi" nominasiyaları üzrə mükafatlar qazanıb.

Fernandesin paylaşımı internetdə müxtəlif reaksiyalara səbəb olub; istifadəçilər iki aviaşirkəti yemək, punktuallıq və salon genişliyi baxımından müqayisə ediblər.

Bəziləri onun "Santan"la bağlı tərifləri ilə razılaşıb; bir istifadəçi "Santan yeməkləri ilə heç nə müqayisə oluna bilməz" şərhini yazıb.

Digərləri isə səyahətçilər üçün punktuallıq və ayaqlar üçün ayrılan məsafə kimi amillərin daha vacib olduğunu vurğulayıblar.

Bir şərhçi "amma onlar vaxtında yola düşürlər" yazarkən, başqa biri ayaqlar üçün ayrılan məsafədəki fərqə dair zarafat edərək bildirib: "Heç olmasa, Singapore Airlines-da oturmaq üçün ayaqlarımı dizdən kəsməyə ehtiyac qalmır".

Bəzi istifadəçilər həmçinin Fernandesin niyə AirAsia ilə uçmadığı barədə ehtimallar irəli sürüblər.

"Görəsən, buna səbəb AirAsia reysinizin ləğv edilməsi və ya gecikməsi olub? Düşünürəm ki, bu, yemək və ya xidmətdən daha vacib məsələdir", - deyə bir şərhçi yazıb.


Reportyor.az 



KARUSEL / İQTİSADİYYAT