May 31-i və iyunun 1-də Bakıda Türk Dövlətləri Qiymətləndiricilərinin III Beynəlxalq Forumu keçiriləcək.
Azərbaycan Qiymətləndiricilər Cəmiyyəti (AQC) məlumat verir ki, forumda Türk Dövlətləri Qiymətləndiricilər Birlikləri Şurasına (CAATS) üzv olan Azərbaycan, Türkiyə, Qazaxıstan, Özbəkistan, Qırğızıstan, Türkmənistan və Şimali Kipr Türk Cümhuriyyətindən olan qiymətləndirmə birliklərinin rəhbərləri və qiymətləndiricilər, qonaq qismində isə Rusiya, Belarus və Gürcüstan qiymətləndirmə birliklərinin rəhbərləri iştirak edəcəklər.
Mayın 31-də CAATS Sədrlər Şurasının iclası keçiriləcək və qurumun nizamnaməsinə uyğun olaraq, prezidentlik səlahiyyətləri AQC sədri Vüqar Orucun timsalında Azərbaycana, vitse-prezidentlik səlahiyyətləri isə Türkiyə Qiymətləndirmə Mütəxəssisləri Birliyinin sədri Yaşar Bahçecinin şəxsində Türkiyəyə dövr ediləcək. İclasda Şuranın gələcək fəaliyyət istiqamətləri barədə ətraflı müzakirələr aparılacaq və mühüm qərarlar qəbul ediləcək.
İyunun 1-də isə Bakı Konqres Mərkəzində II Beynəlxalq Forum öz işinə başlayacaq. Foruma xarici qonaqlarla yanaşı, Azərbaycanın dövlət rəsmiləri, Milli Məclisin deputatları, vətəndaş cəmiyyəti institutlarının, kütləvi informasiya vasitələrinin və ekosistemin nümayəndələri qatılacaqlar. Forumda türk dövlətləri qiymətləndiriciləri, eləcə də iqtisadçıları arasında yeni əməkdaşlıq formatları, koordinasiyalı fəaliyyətin təşkili, ortaq milli qiymətləndirmə standartlarının və vahid məlumat bazasının formalaşdırılması istiqamətində müzakirələr aparılacaq. Tədbirin panel mərhələsində isə qiymətləndirmə sektorunun inkişafı, regional və beynəlxalq perspektivlər mövzusunda çıxışlar nəzərdə tutulub.
Xatırladaq ki, Türk Dövlətləri Qiymətləndiricilər Birlikləri Şurasının yaradılması barədə qarşılıqlı razılaşma müqaviləsi 2023-cü ilin aprel ayında Bakıda keçirilən “Zirvə Görüşü”ndə imzalanıb və iyun ayının 1-də Qazaxıstanın Türküstan şəhərində təsis olunub. Ötən ilin noyabr ayında isə Ankara şəhərində Türk Dövlətləri Qiymətləndiricilərinin II Beynəlxalq Forumu keçirilib. Hazırda 700 qiymətləndirmə şirkəti və minlərlə qiymətləndirici Şuranın üzvü olan birliklərdə fəaliyyət göstərir. Ölkəmizi bu təşkilatda qiymətləndiricilərin yeganə platforması olan AQC təmsil edir.(report)


KARUSEL / İQTİSADİYYAT