BMT-nin Baş katibi Antoniu Quterreş Təşkilatın rəhbəri vəzifəsində sonuncu ilində, 2026-cı ildə Təhlükəsizlik Şurasında islahatları gücləndirmək niyyətində olduğunu açıqladı.

O,bunu Nyu-Yorkda jurnalistlərə bildirib.

Beynəlxalq münasibətlərin hazırkı vəziyyətini güc qanunu qanunun gücünə qalib gəlir kimi xarakterizə edən Quterreş, dünyanın artan qeyri-sabitlik dövrünə qədəm qoyduğunu, geosiyasi bölünmələr, cəzasızlıq və beynəlxalq hüququn zəifləməsi ilə daha da pisləşdiyini qeyd etdi.

Onun sözlərinə görə, humanitar maliyyələşdirmənin azaldılması əhalinin köçürülməsi və həyat itkisinin artması da daxil olmaqla böhranların zəncirvari reaksiyasına səbəb olur. Eyni zamanda, sosial bərabərsizlik və iqlim riskləri artır, yeni texnologiyaların nəzarətsiz inkişafı isə qlobal sabitliyə əlavə təhdidlər yaradır.

Baş katib, inkişaf etməkdə olan ölkələrin iqtisadi rolunun artdığı və Cənub-Cənub əməkdaşlığının gücləndiyi sürətlə dəyişən dünyada mövcud qlobal idarəetmə mexanizmlərinin qeyri-kafi olduğunu vurğuladı.

Çoxqütblü tərəfdaşlığın inkişafını müdafiə edən Quterreş qeyd etdi ki, bu, yalnız güclü və qanuni çoxtərəfli qurumlar vasitəsilə mümkündür. Bu kontekstdə o, Təhlükəsizlik Şurasının islahatını sülhün və təhlükəsizliyin qorunması üçün BMT-nin əsas prioriteti kimi müəyyən etdi.

Baş katib 2026-cı il üçün digər prioritetlər arasında Davamlı İnkişaf Məqsədlərinə nail olmağı, iqlim dəyişikliyi ilə mübarizəni və süni intellekt üçün qlobal idarəetmə sisteminin inkişaf etdirilməsini, o cümlədən BMT-nin Süni İntellekt üzrə Beynəlxalq Elmi İşçi Qrupunun işini vurğuladı.


Reportyor.az 


KARUSEL / DÜNYA