"Frontiers in Oral Health" jurnalında dərc olunmuş bu yaxınlarda aparılan elmi araşdırma, zehni sağlamlığın yalnız insanın əhval-ruhiyyəsinə deyil, həm də ağız sağlamlığına əhəmiyyətli dərəcədə təsir etdiyini müəyyən edib.

Tədqiqatçılar 650 yetkinin məlumatlarını təhlil edərək, iştirakçıların ağız sağlamlığı ilə əlaqəli həyat keyfiyyəti ilə yanaşı, depressiya və narahatlıq simptomlarını da qiymətləndiriblər. Tədqiqatda beynəlxalq səviyyədə tanınmış PHQ-9, GAD-7 və OHIP-14 anketlərindən istifadə edilib.

Nəticələr depressiya və narahatlıq simptomlarının şiddəti ilə iştirakçıların diş və diş əti sağlamlığına dair fikirləri arasında müsbət əlaqə olduğunu aşkar edib. Daha ağır psixoloji simptomlar da ağız sağlamlığı problemlərinin gündəlik həyata daha böyük təsiri ilə əlaqələndirilib.

Bu əlaqə xüsusilə ağır depressiya və yüksək səviyyədə narahatlıq keçirən insanlar arasında güclü olub.

Tədqiqatçılar həmçinin ağız sağlamlığının zəif göstəricilərinin 45 yaşdan yuxarı insanlar və orta gəlirli ailələrdən olanlar arasında daha çox yayıldığını aşkar ediblər.

Tədqiqatın müəllifləri deyirlər ki, nəticələr stomatoloqların müalicə zamanı xəstələrin zehni sağlamlığını nəzərə almasının vacibliyini vurğulayır.

Depressiya və narahatlıq qiymətləndirmələrinin hərtərəfli stomatoloji müalicə planlarına daxil edilməsi ağız boşluğu xəstəliklərinin qarşısının alınması və müalicəsinin yaxşılaşdırılmasında mühüm rol oynaya bilər.

Səhiyyə mütəxəssisləri həmçinin qeyd edirlər ki, xroniki stress və narahatlıq hormon tənzimlənməsinə və bədənin vacib vitaminləri mənimsəmə qabiliyyətinə mənfi təsir göstərə bilər, immunitet sistemini zəiflədə və ağız və diş xəstəlikləri də daxil olmaqla müxtəlif xəstəliklərin riskini artıra bilər.

Bundan əlavə, narahatlıq və stressdən əziyyət çəkən bəzi insanlarda bruksizm (dişlərin qıcırtısı) inkişaf edir ki, bu da müalicə olunmazsa, tədricən dişlərə zərər verə və sınıq yarada bilər.


Reportyor.az 



KARUSEL / CƏMİYYƏT