Bill Qeyts bildirib ki, dünyada heç bir hökumət süni intellektin cəmiyyətə gətirəcəyi dəyişikliklərə hazır deyil və gələcək risklər barədə xəbərdarlıq edib.

Milyarder və "Microsoft"un həmtəsisçisi bu yaxınlara qədər süni intellektlə bağlı nikbin fikirdə olsa da, mövqeyini dəyişib; o, iş yerləri üçün təhlükələr, hücumlarla bağlı narahatlıqlar və süni intellekt həvəskarlarının üzləşdiyi asılılıq riskləri barədə xəbərdarlıq edir.

Qeyts "Reuters"ə müsahibəsində deyib: "Düşünmürəm ki, hər hansı hökumət buna layiq olduğu səviyyədə diqqət yetirir". Bununla belə, o əlavə edib ki, düzgün idarə olunduğu və bərabər əsaslarla əlçatan edildiyi təqdirdə, bu texnologiya dünyanın ən yoxsul insanlarına kömək etmək üçün böyük potensiala malikdir.

Qeytsin adını daşıyan xeyriyyə fondu bu gün (çərşənbə axşamı) elan edib ki, növbəti iki il ərzində süni intellektə çıxış imkanlarının genişləndirilməsinə azı 1 milyard dollar xərcləməyi planlaşdırır.

Qeyts narahatlıqları ilə bağlı dünya liderləri, o cümlədən ABŞ Prezidenti Donald Tramp və onun komandası ilə danışdığını bildirib və qeyd edib ki, bu ilin sonlarında Çin Prezidenti Si Tszinpinlə görüşməyi planlaşdırır. O əlavə edib: "Hökumətlər bu sahədə xeyli geridə qalırlar".

Lakin narahatlıqlarına baxmayaraq, Qeyts və onun fondu ümid edir ki, süni intellekt varlılarla yoxsullar arasındakı uçurumu dərinləşdirmək əvəzinə, onu azaltmağa kömək edəcək.

Fond bildirib ki, illik 9 milyard dollar xərcləməklə bağlı əvvəllər elan edilmiş planların bir hissəsi olan 1 milyard dollarlıq xərc planı təhsil, səhiyyə və kənd təsərrüfatı sahələrində fəaliyyət göstərən tərəfdaşlara yönəldiləcək.

Fond həmçinin süni intellektin əsaslandığı məlumat bazalarının yaradılmasına – məsələn, böyük dil modellərinin insanların danışdığı bütün dillərdə işləməsinin təmin edilməsinə – kömək etməyi hədəfləyir.

Qeyts deyib: "Səhiyyə sahəsində onun potensialını qiymətləndirməmək mümkün deyil" – bura səhiyyə işçilərinə dəstəkdən tutmuş yeni dərman və vaksinlərin kəşfinə qədər geniş bir spektr daxildir.

Lakin o qeyd edib ki, problemlərin qarşısını almaq üçün hökumətlər əməkdaşlıq etməlidirlər və süni intellektin meydana çıxmasını fəlakət filmi ilə müqayisə edib.

O deyib: "Elə filmlər var ki, orada yadplanetlilər peyda olur və hansısa sehrli şəkildə ABŞ, Çin və digər ölkələr problemi həll etmək üçün birləşirlər. Süni intellekt də bir növ həmin yadplanetli zəkasına bənzəyir. Bu, artıq baş verib və bizim üçün ən yaxşısı həmin filmlərdəki kimi hərəkət etmək olardı ".


Reportyor.az 



KARUSEL / DÜNYA