Pakistan tamamilə elektron pasportlara keçid tədbirləri çərçivəsində yeni maşınla oxuna bilən pasportların (MRP) verilməsini dayandırmaq qərarına gəlib.

Yerli mətbuatın yazdığına görə, İmmiqrasiya və Pasportlar üzrə Baş İdarə (DGI&P) 15 oktyabr 2026-cı il tarixindən etibarən maşınla oxuna bilən pasportlar üçün müraciətlərin qəbulunu və emalını dayandırmağı planlaşdırır.

Yeni qaydalara əsasən, vətəndaşların yeni maşınla oxuna bilən pasport almaq üçün müraciət etmələrinə 14 oktyabr tarixinə qədər vaxt veriləcək. Bu tarixdən sonra yeni pasport müraciətləri yalnız elektron pasportlar (e-pasportlar) üçün qəbul ediləcək.

Bu siyasət mövcud maşınla oxuna bilən pasportlara da şamil edilir. Həmin sənədlər etibarlılıq müddəti bitənə qədər qüvvədə qalacaq, lakin müddəti bitdikdən sonra yenilənməyəcək.

DGI&P bu qərar barədə ölkə daxilindəki pasport şöbələrinə rəsmi sərəncamla məlumat verib. Eyni zamanda, xaricdə fəaliyyət göstərən Pakistan diplomatik nümayəndəliklərinə də yenilənmiş pasport siyasətini tətbiq etmək barədə təlimat verilib.

2026-cı ilin iyun ayında Daxili İşlər Naziri Möhsün Naqvi hökumətin maşınla oxuna bilən pasportlardan mərhələli şəkildə imtina etmək və tamamilə elektron pasportlara keçmək qərarına gəldiyini elan etmişdi.

Pasport və İmmiqrasiya İdarəsinin mərkəzi ofisində keçirilən xüsusi iclasda çıxış edən Naqvi bildirib ki, tam keçid saxtakarlıq və sənəd saxtalaşdırma hallarını aradan qaldıracaq.

Elektron pasport (e-pasport), səhifələrindən birinə elektron çip yerləşdirilmiş yüksək təhlükəsizliyə malik səyahət sənədidir. Təmassız NFC çipi biometrik məlumatları, üz cizgilərini, bioqrafik məlumatları, unikal identifikasiya nömrəsini və rəqəmsal imzanı təhlükəsiz şəkildə saxlayır. Çip sərhəd nəzarəti sistemlərinə və ağıllı cihazlara məlumatları simsiz oxumağa imkan verir.

Pakistanın elektron pasportları Beynəlxalq Mülki Aviasiya Təşkilatının standartlarına uyğundur. Pakistan elektron pasportuna sahib olan şəxslər dünya üzrə hava limanlarında elektron keçid (e-gate) sistemlərindən istifadə edə biləcəklər ki, bu da immiqrasiya növbələrini azaldacaq.

Reportyor.az 


KARUSEL / DÜNYA