Prezident Bəşər Əsədin ələvi azlıq icmasının on minlərlə üzvü hökumət əleyhinə qüvvələrin irəliləyişlərini davam etdirəcəyindən qorxaraq dünən Suriyanın üçüncü şəhəri Homsdan qaçıblar.

Reportyor.az xəbər verir ki, Homs müxalifət döyüşçülərinin ələ keçirdiyi Həma şəhərindən cəmi 40 kilometr (25 mil) cənubda yerləşir.

Təhlilçilər, Heyət Təhrir əl-Şamın (HTS) başçılıq etdiyi döyüşçülərin Dəməşq və Aralıq dənizi sahilindəki ələvilərin mərkəzi arasında əsas əlaqə olan şəhərə doğru irəliləyəcəyini gözlədiklərini söyləyib.

Britaniyada yerləşən Suriya İnsan Haqları Müşahidə Qrupu, Ələvilərin Homs məhəllələrindən kütləvi şəkildə qaçdığını, on minlərlə insanın üsyançıların irəliləməsindən qorxaraq Suriya sahillərinə doğru getdiyini bildirib.

2014-cü ilin aprelində Homsda ələvilərin çoxluq təşkil etdiyi məhəlləni hədəf alan ikiqat hücumlar nəticəsində əksəriyyəti mülki şəxslər olmaqla ən azı 100 nəfər həlak olub.

Hücumları əvvəllər HTŞ lideri Əbu Məhəmməd əl-Colaninin rəhbərlik etdiyi Əl-Qaidənin Suriya qolu olan Ən-Nusra Cəbhəsi öz üzərinə götürüb.

Colani, qrupunun 2016-cı ildə Əl-Qaidə ilə əlaqələrini kəsdiyini açıqlayıb və Əl-Nusra gələn il ləğv edilərək HTS-in əsas komponenti ilə əvəzlənib.

Əsədin müttəfiqi Rusiya tərəfindən idarə olunan hərbi-dəniz bazasına ev sahibliyi edən əyalət 13 ildir davam edən müharibəyə baxmayaraq təhlükəsizliyini qoruyub.
KARUSEL / DÜNYA