Nyu-York ştatının Səhiyyə Departamenti ştatda davam edən və 170-dən çox insanın yoluxmasına səbəb olan qızılca epidemiyası fonunda bir uşağın bu xəstəlikdən vəfat etdiyini açıqlayıb.

Rayon və ştat səhiyyə idarələrinin birgə bəyanatına əsasən, ölüm hadisəsi ştatın şimal-qərb hissəsində yerləşən Lyuis dairəsində (Lewis County) baş verib. Səhiyyə rəsmiləri ölüm hadisəsi ilə bağlı əlavə təfərrüat açıqlamayıblar.

Ştat qubernatoru Keti Hoçul "X" sosial şəbəkəsindəki paylaşımında bildirib: "Bu, Nyu-Yorkda son 30 ildə qızılca ilə əlaqəli ilk ölüm halıdır. Bu, Vaşinqtonun amerikalıları qarşısı alına bilən xəstəliklərdən qorumaq sahəsində onilliklər ərzində əldə edilmiş irəliləyişlərə zərbə vurmasının yaratdığı riskləri xatırladan acı bir hadisədir".

Bu hadisə, qonşu Pensilvaniya ştatında 1430-dan çox insanın yoluxduğu qızılca epidemiyası nəticəsində beş nəfərin vəfat etməsi barədə məlumatların təsdiqlənməsindən sonra baş verib.
Səhiyyə və Sosial Xidmətlər Naziri Robert F. Kennedi kiçik (Robert F. Kennedy Jr.) sözügedən ölüm halları ilə bağlı şübhələrini ifadə edib ki, bu da ştat qubernatoru Coş Şapiro ilə siyasi mübahisəyə səbəb olub.

ABŞ Xəstəliklərə Nəzarət və Profilaktika Mərkəzləri (CDC) bu ölüm hallarından yalnız üçünü təsdiqləyib. Bu, qurumun adət etdiyi təcrübədən fərqli bir yanaşmadır; hazırda agentlik epidemioloqlardan ibarət kənar bir qrupla birlikdə, ölümün məhz qızılca səbəbindən baş verdiyini müəyyən etmək üçün dəqiq meyarların hazırlanması üzərində işləyir.

Reportyor.az 



KARUSEL / DÜNYA