Asiyanın ən varlı adamı, hindistanlı milyarder Mukeş Ambani sərvətini ən çox artıranlar siyahısında İlon Maskın sırasına qoşuldu.

"Forbes" jurnalının real vaxt rejimindəki məlumatlarına əsasən, bazar dəyərinə görə Hindistanın ən böyük şirkəti olan "Reliance Industries" konqlomeratının rəhbərinin aktivləri saat 15:09-a olan vəziyyətə görə 8 milyard ABŞ dolları artıb.

Hazırda 69 yaşlı Ambani 88,3 milyard dollarlıq sərvətə sahibdir və dünya üzrə 22-ci yerdə qərarlaşıb.

Onun əldə etdiyi artım yalnız dünyanın ən varlı milyarderi İlon Maskdan geri qalır; Mask öz sərvətinə 10 milyard dollar əlavə edərək, ümumi varidatını 878,5 milyard dollara çatdırıb.

Asiyada Ambani "TikTok"un yaradıcısı Çjan İmin (84 milyard dollar), infrastruktur maqnatı Qautam Adani (79 milyard dollar) və "Uniqlo"nun qurucusu Tadaşi Yanai (65 milyard dollar) ilə müqayisədə daha varlıdır.

Ambaninin sərvəti, onun yeni rəqəmsal və telekommunikasiya platforması olan "Jio Platforms"un birjada yerləşdirilməsindən sonra artıb. Şirkət ötən həftə Mumbay birjasındakı debütündə 27%-lik artım nümayiş etdirərək 3,2 milyard dollar vəsait cəlb edib.

"Reliance Industries"in səhmləri son beş gün ərzində 8,5% bahalaşıb.

Çərşənbə axşamı sərvətini ən çox artıran digər şəxslər arasında sərvəti 4,7 milyard dollar artan "Amazon"un qurucusu Ceff Bezos, həmçinin hər biri öz varidatına 3,8 milyard dollar əlavə edən pərakəndə satış nəhəngi "Walmart"ın varisləri Rob və Cim Uoltonlar da var.

Reportyor.az 



KARUSEL / İQTİSADİYYAT