Malayziyaya məxsus Penang adası "National Geographic"in 2027-ci ildə dünyada səyahət ediləcək ən yaxşı yerlər siyahısına düşüb və bu siyahıya daxil olan yeganə Cənub-Şərqi Asiya məkanı olub.

Oktyabrın 20-də açıqlanan bu illik siyahıda səyahətçilərin gələn il kəşf edə biləcəkləri, dünyanın müxtəlif yerlərində yerləşən 25 məkan və səyahət təcrübəsi təqdim olunur.

Seçim prosesi "National Geographic"in səyahət üzrə mütəxəssisləri və "Nat Geo Traveler"in beynəlxalq redaksiya heyətlərinin iştirakı ilə namizədlərin irəli sürülməsi, araşdırma və təhlil mərhələlərindən ibarət olub.

"National Geographic" Penangın təbii gözəllikləri ilə mədəni irsinin unikal vəhdətini xüsusi vurğulayıb. Bura UNESCO-nun Ümumdünya İrs Siyahısına daxil edilmiş Corc Taun (George Town) şəhərinin tarixi küçələrindən tutmuş, yağış meşələri ilə əhatə olunmuş çimərliklərə, ənənəvi kəndlərə və manqrov meşələri ilə örtülü dolama çaylara qədər müxtəlif məkanları əhatə edir.

Penang bütün Asiyada özünün zəngin və rəngarəng mətbəxi ilə tanınır. Burada yerli əhalinin sevimli yeməkləri arasında "wok" tavada qızardılmış düyü əriştəsi xörəyi olan "Char Koay Teow" və balıq əsaslı, turşməzə əriştə şorbası – "Penang Assam Laksa" xüsusi yer tutur.

Adada yüksək qiymətləndirilən iaşə obyektləri də mövcuddur; məsələn, ənənəvi "Nyonya" mətbəxi ilə tanınan "Auntie Gaik Lean's Old School Eatery" və müasir yüksək səviyyəli restoran təcrübəsi təqdim edən "Au Jardin" restoranı buna misaldır.

"Bernama" agentliyinin məlumatına görə, oktyabrın 21-də açıqlama verən ştatın Turizm və Yaradıcı İqtisadiyyat Komitəsinin sədri Vonq Hon Vay (Wong Hon Wai), Penangın "NatGeo" siyahısına düşməsini qürurverici bir nailiyyət adlandırıb. O, bu tanınmanın ştatın özünəməxsus görməli yerlərini qlobal auditoriyaya təqdim etmək üçün əla fürsət olduğunu vurğulayıb.

2027-ci il siyahısına daxil olan digər məkanlar arasında Norveçdə Vestland, Misirdə Luksor, Yaponiyada Niiqata, Çində Çendu, Hindistanda Caypur və Avstraliyada Melburn şəhərləri yer alır. 


Reportyor.az 


MARAQLI / KARUSEL