Malayziyalı müğənni və aktrisa Bella Astillah, siyasətçi Syed Saddiq ilə evliliyini qeyd etmək üçün doğma Sabah ştatında təxminən 20 000 nəfərin toplaşdığını görərək kövrəlib və göz yaşlarına hakim ola bilməyib.

Cütlük, Kuala-Lumpur və Muarda baş tutan əvvəlki şənliklərdən sonra, 31 oktyabr tarixində üçüncü və sonuncu toy mərasimini keçirdi.

Tədbir, yerli icma üzvlərinin də şənliyə qoşulmasına imkan verən ənənəvi kütləvi ziyafət — "kenduri rakyat" formatında təşkil olunmuşdu.

"The Star" qəzetinin məlumatına görə, bəy və gəlin bir-biri ilə uyğunlaşan, qara və qırmızı rəngli, müasir üslubda hazırlanmış ənənəvi geyimlərdə saat 13:30 radələrində məkana gəldilər; bəzi qonaqlar isə artıq səhər saat 06:00-dan etibarən orada gözləyirdilər.

Tədbirə Sabahın müxtəlif bölgələrindən, eləcə də Labuan və Bruneydən insanlar gəlmişdi. Bir çox iştirakçı, Sabahın etnik irsini ön plana çıxaran şənlik mövzusuna uyğun olaraq, Bajau, Kadazan və Murut xalqlarına məxsus ənənəvi geyimlər geyinmişdi.

Təşkilatçılar qeydiyyatdan keçmiş qonaqlar üçün yemək və içkilər təmin etmişdilər. Bəzi iştirakçılar sosial şəbəkələrdə bildirdilər ki, onlar gözləməyə hazır idilər və hətta yemək tükənsə belə, bundan məyus olmazdılar; çünki əsas məqsədləri cütlüyə dəstək olduqlarını göstərmək idi.

Mərasim zamanı Bella və Syed Saddiq Sabahın ənənəvi musiqiləri sədaları altında rəqs etdilər. Bundan əlavə, müğənni həyat yoldaşına həsr etdiyi bir sevgi mahnısını da ifa etdi.

Yerli ifaçılar ənənəvi mahnılar və mədəni çıxışlarla qonaqları əyləndirdilər.

Şənliyin əslində saat 16:00-a qədər davam etməsi planlaşdırılmışdı, lakin saat 15:00 radələrində başlayan güclü tufan səbəbindən təşkilatçılar tədbiri nəzərdə tutulandan bir qədər tez yekunlaşdırdılar.

Əsl adı Dayang Ara Nabellah Awang Astillah olan Bella, 2025-ci ilin aprelində "TikTok" platformasında canlı yayım zamanı açıqladı ki, o, Malayziyanın keçmiş Gənclər və İdman naziri Syed Saddiq ilə ilk dəfə 2022-ci ildə bir radio stansiyasında tanış olub.

"Malaymail" nəşrinin məlumatına görə, hər ikisinin şəxsi həyatlarında çətinliklər yaşadığı 2024-cü ildə onlar bir-birinə daha da yaxınlaşıblar. Seyid Saddiq, 2023-cü ildə etibar sui-istifadəsi, əmlakın mənimsənilməsi və çirkli pulların yuyulması ilə bağlı çıxarılmış məhkumiyyət hökmünə qarşı verdiyi apellyasiya şikayətinin nəticəsini gözləyirdi.

Bu ərəfədə Bella, 2024-cü ilin mart ayında aktrisa Ruhainies ilə yaşadığı və geniş ictimai rezonans doğuran "xəlvət" (yaxın təmas) qalmaqalından sonra, sinqapurlu müğənni və aktyor Aliff Əzizlə boşanma prosesindən keçirdi. Cütlük həmin ilin iyununda boşandı və iki övladının qəyyumluğu Bellaya verildi.


Reportyor.az 




KARUSEL / CƏMİYYƏT