İsrailin İrana cavab zərbəsi endirmək planlarına dair ABŞ kəşfiyyatının çox məxfi sənədlərini sızdıran keçmiş Mərkəzi Kəşfiyyat İdarəsinin analitiki çərşənbə günü 37 ay həbs cəzasına məhkum edilib.

Reportyor.az bu barədə xarici KİV-ə istinadla bildirir.

2016-cı ildən Mərkəzi Kəşfiyyat İdarəsində çalışan və son dərəcə məxfi təhlükəsizlik rəsmiləşdirilməsinə malik olan 34 yaşlı Asif Rəhman noyabr ayında Kambocada Federal Təhqiqat Bürosunun əməkdaşları tərəfindən həbs edilib.

Yanvar ayında Rəhman Virciniya ştatındakı federal məhkəmə binasında milli müdafiə məlumatlarının qəsdən saxlanması və ötürülməsi ilə bağlı iki ittiham üzrə təqsirli bilinib.

Onu 20 ilə qədər həbs cəzası gözləyirdi.

İran oktyabrın 1-də Tehranın dəstəklədiyi Həmas və Hizbullah yaraqlı qruplarının yüksək vəzifəli şəxslərinin öldürülməsinə cavab olaraq İsrailə 200-ə yaxın ballistik raket zərbəsi endirib.

İsrail oktyabrın sonunda İrandakı hərbi obyektlərə zərbələr dalğası ilə cavab verdi.

Məhkəmə iddiasına görə, oktyabrın 17-də Rəhman Birləşmiş Ştatların xarici müttəfiqi və onun xarici düşmənə qarşı planlaşdırdığı kinetik hərəkətləri ilə bağlı iki çox məxfi sənədi çap edib.

O, sənədlərin şəklini çəkib və mənbəsini gizlətmək və fəaliyyətini silmək məqsədilə şəkilləri redaktə etmək üçün kompüter proqramından istifadə edib.

Rəhman daha sonra sənədləri iş yerində xırdalamadan əvvəl onları almaq hüququ olmadığını bildiyi bir çox şəxsə ötürür.

“Middle East Spectator” adlı hesab tərəfindən Telegram proqramında yayılan sənədlərdə İsrailin İrana mümkün hücuma hazırlığı təsvir edilib, lakin heç bir faktiki hədəf müəyyən edilməyib.

“The Washington Post” qəzetinin yazdığına görə, ABŞ Milli Geoməkan-Kəşfiyyat Agentliyi tərəfindən hazırlanmış sənədlər İsrail aerodromunda aviasiya təlimləri və döyüş sursatlarının hərəkətini təsvir edir.

Məlumatın sızması İsrail rəsmilərinin cavab zərbəsini təxirə salmasına səbəb olub.




KARUSEL / DÜNYA