Nigeriya qüvvələri verdiyi açıqlamada ölkənin şimal-şərqində keçirilən əməliyyat zamanı Boko Haram komandirini və terrorçu qrupun digər 10 üzvünü öldürdüyünü bildirib.

Xarivi media xəbər verir ki,  əsgərlər əməliyyatı Borno əyalətində yerləşən Sambisa meşəsində həyata keçiriblər.

Ordu ölən komandiri Sambisa meşəsində Boko Haramın ikinci komandiri olan Əbu Xalid kimi müəyyən edib. O, terrorçu qruplaşmanın Sambisa oxu boyunca əməliyyatların və logistikanın əlaqələndirilməsindən məsul olan əsas fiqurlarından biri kimi təsvir edilib.

Bəyanatda əlavə edilib ki, Nigeriya qoşunları arasında itki qeydə alınmayıb və şimal-şərqdəki meşəlik ərazilərdə antiterror əməliyyatlarının davam etdiyi qeyd olunub.

Boko Haram 2000-ci illərin əvvəllərindən Nigeriyada fəaliyyət göstərir və 2009-cu ildən bəri hücumlarda on minlərlə insan həlak olub.

Hakimiyyət orqanlarının məlumatına görə, 2015-ci ildən bəri qrup qonşu Kamerun, Çad və Nigerdə də hücumlar həyata keçirib və Çad gölü hövzəsində ən azı 2000 nəfər həlak olub.

Bölgədə terror hücumları və davam edən toqquşmalar nəticəsində yüz minlərlə insan da didərgin düşüb.


Reportyor.az 


KARUSEL / DÜNYA