Gürcüstanın İqtisadiyyat və Davamlı İnkişaf naziri Mariam Kvrivişvili layihə sahəsinə səfəri zamanı bildirib ki, Anakliya dərinsulu limanının tikintisi başlayıb və artıq aktiv mərhələyə qədəm qoyub.

Yerli media bu barədə məlumat verib. 

Nazir, Baş nazirin müavini və müdafiə naziri İrakli Çikovani ilə birlikdə strateji əhəmiyyətli liman layihəsinin tikinti sahəsinə ilk dəfə baş çəkib.

Kvrivişvili bildirib ki, podratçı şirkətlə danışıqlar ilkin müqavilənin optimallaşdırılmasına və layihə xərclərinin 52 milyon dollar azaldılmasına gətirib çıxarıb.

Kvrivişvili deyib: “Anakliya dərinsulu limanı ölkəmizin iqtisadiyyatı üçün strateji əhəmiyyət kəsb edən bir layihədir. Bu, limanı, bitişik infrastrukturu və azad sənaye zonasını əhatə edən mürəkkəb bir obyekt olacaq.”

O əlavə edib ki, layihəyə həmçinin liman əməliyyatlarını dəstəkləməsi gözlənilən giriş yolu və dəmir yolu xətti daxildir.

Nazir bildirib ki, yaxın gələcəkdə birləşdirici yolun və 18 km-lik dəmir yolu xəttinin tikintisinə başlanılacaq.

O, hökumətin 10 illik Gürcüstan Dəmir Yolunun inkişaf planında dəmir yolunun inteqrasiya olunmuş nəqliyyat və logistika sisteminin bir hissəsi kimi yer aldığını qeyd edərək, əlavə etdi ki, artan yük axını güclü dəniz keçidi tələb edir.

Kvrivişvili Anakliya layihəsinin bu prosesin məntiqi davamı olduğunu söyləyərək, dəmir yolu və limanın birgə inkişafının Gürcüstanın regional nəqliyyat mərkəzi kimi rolunu gücləndirəcəyini qeyd etdi.

O, həmçinin beynəlxalq şirkətlərin və mütəxəssislərin tikinti prosesində iştirak etdiyini, yerli sakinlərin işə götürülməsinə isə xüsusi diqqət yetirildiyini söylədi.

Dəniz infrastrukturu işlərini Avropanın "Böyük Dördlük" adlandırılan tikinti qruplarının bir hissəsi olan Belçika şirkəti Jan De Nul N.V. həyata keçirir.


Reportyor.az 



KARUSEL / İQTİSADİYYAT