Çərşənbə günü hökumət sözçüsü bildirib ki, Malayziya 5000 Myanma qaçqınının geri qayıtdıqdan sonra həyatları təhlükədə olduğu aşkar edilərsə, onları geri qaytarmayacaq. Baş nazir Ənvər İbrahim bildirib ki, geri qaytarılacaq 5000 nəfər etnik Rohingya qaçqınıdır və bu addım Malayziyada yerli icmalarla artan gərginlikdən sonra həyata keçirilir.

İğtişaşlar zamanı ölkə daxilində Rohingya qaçqın məktəbləri bağlanıb, bir çox Rohingya uşağının təqib və təhdidlərlə üzləşdiyi bildirilir.

Bəzi qaçqınlar həmçinin Penanq əyalətindəki evlərindən çıxarılıb və Kuala Lumpurdakı BMT QAK binasının qarşısında toplaşdıqdan sonra hakimiyyət orqanları tərəfindən qısa müddətə saxlanılıb.

Rabitə naziri Fəhmi Fadzil müntəzəm mətbuat brifinqində bildirib ki, xarici işlər və daxili işlər nazirlikləri hazırda Myanmaya qaytarılacaq 5000 qaçqının müəyyən edilməsi planını nəzərdən keçirirlər.

“Malayziya, məsuliyyətli bir ölkə olaraq, 5000 Myanma qaçqını təqib olunacağı və ya həyatları təhlükə altında olacağı təqdirdə geri qaytarmayacaq”, - deyə o bildirib.

Hökumətin sözçüsü olan Fəhmi əlavə edib: “Hökumət
planı tətbiq etməzdən əvvəl Myanma hökuməti ilə araşdırılacaq və müzakirə ediləcək bir neçə məsələ var”.

“Myanmadakı xunta hökuməti onları qəbul etməyə hazırdır, lakin biz meyarların nə olduğunu öyrənəcəyik və uyğun olarsa, onu tətbiq edəcəyik. Baş nazir həyatları təhlükə altında olarsa, onları geri göndərə bilməyəcəyimizi qeyd edib. Buna görə də hazırda Xarici İşlər Nazirliyi tərəfindən araşdırılan bir neçə məsələ var”, - deyə o əlavə edib.

Qeyri-hökumət təşkilatı olan Human Rights Watch, bu qaçqınların Myanmada təqib və digər hüquq pozuntuları ilə üzləşdiyini qeyd edərək, hökuməti planlarını dəyişdirməyə çağırıb.

Human Rights Watch təşkilatının Asiya üzrə direktor müavini Bryony Lau verdiyi açıqlamada bildirib ki, "Malayziya hökuməti xuntanın vəhşiliyinin hədəfi olan insanları zorla geri qaytarmaq əvəzinə, Myanmadakı böhrana cavab verməkdə regional liderlik nümayiş etdirməlidir".

Reportyor.az 




KARUSEL / DÜNYA