Pakistan Yaxın Şərqdəki münaqişənin həllinə töhfə vermək məqsədilə səylərini artırır; Xarici İşlər Nazirliyinin rəsmisi Asim İftixar Əhməd bildirib ki, İslamabad dialoq, həmçinin beynəlxalq və BMT-nin dəstəklədiyi mexanizmlər vasitəsilə sülh yolu ilə həll yolu axtarır.

"Geo News"a açıqlama verən rəsmi bildirib ki, regionda vəziyyətin pisləşməkdə davam etdiyi bir vaxtda Pakistan atəşkəsin əldə edilməsi, gərginliyin azaldılması və tərəflərin danışıqlar masasına qaytarılması istiqamətində iş aparır.

"Bizim səyimiz BMT qanunları çərçivəsində münaqişəyə sülh yolu ilə və beynəlxalq səviyyədə qəbul ediləcək həll yolu tapmaqdır", - deyə Əhməd bildirib və əsas prioritetin döyüşləri dayandırmaq və gərginliyi azaltmaq olduğunu vurğulayıb.

O qeyd edib ki, BMT Təhlükəsizlik Şurasının Nizamnaməsi mübahisələrin müharibə yolu ilə deyil, danışıqlar vasitəsilə həllini nəzərdə tutur.

"Təhlükəsizlik Şurasının Nizamnaməsi münaqişələrin müharibə ilə deyil, danışıqlar yolu ilə həllini hədəfləyir", - deyə o bildirib.

Diplomat vəziyyətin mənfi istiqamətdə dəyişdiyini etiraf edib, lakin Pakistanın gərginliyin daha da artmasının qarşısının alınmasında rol oynamaq zərurətini dərk etdiyini vurğulayıb.

"Biz vəziyyətin mənfi istiqamətdə dəyişdiyini qəbul edirik. Biz bunun fərqindəyik və inanırıq ki, öz rolumuzu oynamalıyıq", - deyə o bildirib.

O, həmçinin Pakistanın İran-ABŞ münaqişəsindəki roluna toxunaraq qeyd edib ki, İslamabad həmin qarşıdurma zamanı diplomatik səylərdə ön sıralarda yer alan ölkələrdən biri olub.

"Dünya İran-ABŞ münaqişəsində nələrin baş verəcəyini izləyirdi", - deyən diplomat əlavə edib ki, Pakistan münaqişədə rol oynayan ölkələr arasında "ön sıralarda" olub.

Xarici işlər nazirliyinin rəsmisi həmçinin Pakistan, Səudiyyə Ərəbistanı və Türkiyənin iştirakı ilə əldə edilmiş Məkkə sazişinə toxunaraq bildirib ki, İslamabad regionda sülh və sabitliyi təşviq etmək məqsədilə əlavə məsuliyyət üzərinə götürür.

"Məkkə sazişində hər üç ölkə iştirak edir. Bizim məqsədimiz regionda sülh və sabitlikdir", - deyə o bildirib.

Onun bu açıqlamaları regional böhranın genişləndiyi, döyüşlərin və hücumların Körfəz bölgəsinin təhlükəsizliyinə, enerji infrastrukturuna və əsas dəniz marşrutlarına təsir göstərdiyi bir vaxtda səslənib.

"Reuters" agentliyinin məlumatına görə, münaqişə Pakistan üçün əlavə təzyiq yaradıb; belə ki, ölkə vasitəçi kimi rolu ilə Məkkə sazişi çərçivəsində Səudiyyə Ərəbistanı qarşısındakı müdafiə öhdəlikləri arasında tarazlıq yaratmağa çalışır.

Pakistan ABŞ-İran qarşıdurması zamanı dəfələrlə dialoq və gərginliyin az "Geo News" daha əvvəl xəbər vermişdi ki, İslamabad "İslamabad Anlaşma Memorandumu" (MoU) çərçivəsində diplomatik kanalları açıq saxlamağa çalışıb və tərəfləri danışıqlara qayıtmağa çağırıb.

Əhməd həmçinin Birləşmiş Millətlər Təşkilatının sülh səylərinə töhfə verə bilmədiyi barədə fikirləri rədd edərək, təşkilatın beynəlxalq mübahisələrin həllində rol oynamağa davam etdiyini bildirib.

O qeyd edib ki, Fələstin və Kəşmir məsələləri də BMT Təhlükəsizlik Şurasının müvafiq qətnamələrinə uyğun olaraq həll edilməlidir.

Reportyor.az 



KARUSEL / DÜNYA