Pakistan Hava Limanları İdarəsi (PAA) tərəfindən yayımlanan "Uçuş heyəti üçün bildiriş"ə (NOTAM) əsasən, Pakistan Hindistan təyyarələri üçün hava məkanına qoyduğu qadağanı 24 oktyabr tarixinədək uzadıb.

Qadağanın əvvəlki uzadılma müddəti 24 sentyabrda başa çatırdı.

Bildirişdə qeyd olunur ki, Pakistan hava məkanı Hindistan qeydiyyatında olan təyyarələr, həmçinin Hindistan aviaşirkətləri və ya operatorları tərəfindən idarə olunan, onlara məxsus və ya icarəyə götürülmüş təyyarələr (o cümlədən hərbi uçuşlar) üçün açıq deyil.

Məlumata görə, qadağanın müddətinin uzadılması çərşənbə günü saat 10:45-də qüvvəyə minib və 24 oktyabr 2026-cı il tarixində saat 04:59-dək qüvvədə qalacaq.

Pakistan Mülki Aviasiya İdarəsinin (PCAA) 2022-ci il tarixli sənədinə əsasən, ölkənin hava məkanı iki uçuş məlumatı bölgəsinə (FIR) — Kəraçi və Lahor bölgələrinə bölünür.

Çərşənbə günü yayımlanan bildiriş həm Kəraçi (OPKR), həm də Lahor (OPLR) uçuş məlumatı bölgələrinə şamil edilir.

Ölkənin geniş beynəlxalq şəbəkəyə malik yeganə aviaşirkəti olan "Air India" üçün, keçən ilin oktyabrında Hindistan rəsmilərinə təqdim edilmiş sənədə əsasən, yanacaq xərcləri 29 faizə qədər, bəzi uzunməsafəli marşrutlarda isə uçuş müddəti üç saata qədər artıb. "Tata Group" və "Singapore Airlines"a məxsus olan aviaşirkət Pakistan hava məkanının bağlanmasının vergidən əvvəlki mənfəətə təsirini illik 455 milyon dollar həcmində qiymətləndirib; şirkətin 2024-25-ci maliyyə ilindəki zərərinin 439 milyon dollar təşkil etdiyi nəzərə alındıqda, bu, əhəmiyyətli bir rəqəmdir.

Reportyor.az 




KARUSEL / DÜNYA