Pakistan təhlükəsizlik qüvvələri Bəlucistanın Avaran rayonunun Badrang ərazisində keçirilən kəşfiyyat əsaslı əməliyyat (IBO) zamanı üç terrorçunu məhv edib.

Bu barədə Pakistan yerli mediası təhlükəsizlik mənbələrinə istinadla məlumat verir.
Mənbələrin bildirdiyinə görə, yaraqlılardan külli miqdarda silah və sursat ələ keçirilib.

Bu son əməliyyat, təhlükəsizlik qüvvələrinin Bəlucistanın Mastung bölgəsində, aralarında bir yaraqlı komandirinin də olduğu azı üç terrorçusunu məhv etməsindən bir neçə gün sonraya təsadüf edir.

Təhlükəsizlik mənbələri bildirib ki, əməliyyat zamanı komandir Naqib də daxil olmaqla üç terrorçu öldürülüb və onların avtomobili tamamilə məhv edilib.

Pakistan, xüsusilə Xayber-Paxtunxva və Bəlucistan əyalətlərində, Əfqanıstan Talibanının hakimiyyətə gəldiyi 2021-ci ildən bəri terror fəaliyyətlərinin artması ilə üzləşib.

Tədqiqat və Təhlükəsizlik Araşdırmaları Mərkəzinin (CRSS) hesabatına əsasən, 2026-cı ilin ikinci rübündə bu iki əyalət ölkədə zorakılıq hallarının əsas mərkəzləri olaraq qalıb və Xayber-Paxtunxva (KP) ən çox zərər çəkən bölgə kimi qeydə alınıb.

Xəbərdə qeyd olunub ki, həmin rüb ərzində qeydə alınan zorakılıqla bağlı bütün ölüm hallarının təxminən 96%-i KP və Bəlucistanın payına düşüb. Ümumi ölüm hallarının 61%-dən çoxu (475 nəfər) KP-də, 34%-i (265 nəfər) isə Bəlucistanda qeydə alınıb.

Həmçinin, ən çox zorakılıq hadisəsi KP-də qeydə alınıb – 151 hadisə, bu da ölkə üzrə ümumi göstəricinin 57%-ni təşkil edir. Bəlucistan 94 hadisə və ya 35%-lik göstərici ilə ikinci yerdə qərarlaşıb ki, bu da yaraqlı fəaliyyətinin məhz bu iki əyalətdə cəmləşdiyini vurğulayır.


Reportyor.az 



KARUSEL / DÜNYA