Cənub-Şərqi Asiyada ən çox ziyarət edilən ikinci ölkə olan Taylandda 1 yanvar – 19 sentyabr tarixləri arasında 22,1 milyon əcnəbi turist qeydə alınıb. Bu rəqəm ötən illə müqayisədə 3,67% azalma demək olsa da, qarşıdakı həftələrdəki əsas bayramların turizmi canlandıracağı gözlənilir.

"Nation Thailand" nəşrinin Turizm və İdman Naziri Surasak Phancharoenworakul-a istinadən verdiyi məlumata görə, 3,7 milyon turistlə Çin ən böyük turist mənbəyi olaraq qalır; ondan sonra müvafiq olaraq 2,8 milyonla Malayziya və 1,6 milyonla Hindistan gəlir.

Rusiya 1,2 milyon turistlə dördüncü yerdə qərarlaşıb, onu isə 811 246 turistlə Cənubi Koreya izləyib.

Həmin dövrdə xarici turizmdən əldə edilən gəlirin 1,08 trilyon bata (32,5 milyard ABŞ dolları) çatdığı təxmin edilir.

"The Thaiger"in məlumatına görə, rəsmilər Asiya ölkələrindəki bir sıra əsas bayramlar səbəbindən qarşıdakı həftədə Taylanda turist axınının bir qədər səngiyəcəyini gözləyirlər.

Cənubi Koreyada "Çusok" (Chuseok) bayramı 24-26 sentyabr tarixlərini əhatə edir, Çində isə Payız Ortası Festivalı 25-27 sentyabr tarixlərinə təsadüf edir və ardınca 1-7 oktyabr tarixlərində Milli Gün "Qızıl Həftəsi" qeyd olunur.

Tayland Turizm İdarəsi (TAT) 25 sentyabr – 7 oktyabr tarixləri arasında təxminən 250 000 çinli ziyarətçinin gələcəyini proqnozlaşdırır ki, bu da ötən illə müqayisədə 24% artım deməkdir və təxminən 11,5 milyard bat həcmində turizm gəliri yaradacaq.

TAT-ın məlumatlarına əsasən, Çindən oktyabr ayı üçün sifarişlər artıq 16% çoxdur, uçuş axtarışları isə 24% artıb.

Tayland bu ilin sonuna qədər 33 milyon turist qəbul etməyi hədəfləyir.

Ötən il ölkəyə 32 milyondan çox turist gəlmiş və o, Malayziyadan (42 milyon) sonra Cənub-Şərqi Asiyada ən çox ziyarət edilən ikinci ölkə olmuşdu.


Reportyor.az 



KARUSEL / İQTİSADİYYAT